Sonic Dash 2: Sonic Boom chega por sorpresa a Google Play

mércores, 1 de xullo do 2015 Marcus Fernández

Sen previo aviso por parte de SEGA, apareceu en Google Play o xogo Sonic Dash 2: Sonic Boom, que vén a ser unha revisión do runner sen fin de Sonic adaptando a estética do personaxe e dos seus amigos á nova serie de televisión Sonic Boom e que tamén se ofrecerá de balde con compras dentro da aplicación, esperándose que en breve tamén estea dispoñible na App Store.
Este xogo permitirá correr por mundos tridimensionais superando retos e podendo encarnar a Sonic, Tails, Knuckles ou Amy, aos que se suma un novo amigo: Sticks. Será posible montar equipos de até 3 personaxes para as nosas carreiras, podendo mudar de personaxe no medio da carreira; empregar os poderes especiais de cadanseu personaxe; dominar novas mecánicas de xogo (como facer uso do Enerbeam inclinando o dispositivo móbil); e a posibilidade de participar en eventos e desafíos diarios.


Sonic Runners

Dá a impresión de que SEGA quere potenciar a figura de Sonic de cara ao verán, pois a semana pasada tamén estreou globalmente o xogo Sonic Runners, que pode descargarse de balde para iOS e para Android, e desta volta ofrece unha perspectiva lateral en 2D.

PUBLICIDADE