TSMC subirá os prezos de fabricación de procesadores até un 20%

A crise dos semicondutores está a afectar a numerosas industriais mundiais ao ser os fabricantes incapaces de atender a demanda actual e iso non só provoca a falta de abastecemento de certos compoñentes, senón que tamén está a ter impacto nos prezos.
O preocupante do asunto é que esta situación semella lonxe de rematar, e hai fontes que indican que un dos principais fabricantes a nivel mundial, TSMC, estaría a notificar aos seus clientes unha suba de prezo do 20% para procesos de fabricación de 16 nanómetros ou inferior, mentres que para fabricacións de 7 nanómetros o prezo subiría un 10%. Tamén están previstas subas de prezo para obleas fabricadas en 28 nanómetros.
Ao falarmos dunha suba de prezo en procesadores de distinto tipo, o impacto sería moi grande en toda a industria tecnolóxica, e incluso coméntase que afectaría de xeito importante aos novos iPhone, que terían que reflectir no seu prezo a nova política dun dos seus principais provedores. O resto de fabricantes de móbiles tamén é probable que experimenten subas de prezo nos vindeiros meses en previsión do encarecemento dos procesadores.