Tecalis, Premio á Excelencia Empresarial 2019
luns, 30 de setembro do 2019
A
empresa galega Tecalis,
centrada en alta tecnoloxía para facilitar a actividade das empresas
e a súa transformación, vén de recibir o Premio á Excelencia
Empresarial, un prestixioso e relevante recoñecemento concedido polo
Instituto de Excelencia Empresarial, que busca, con estes galardóns,
distinguir os esforzos innovadores, sustentábeis, solidarios e
competitivos de empresas, institucións e fundación do eido estatal.
Na gala de entrega dos Premios, novamente no Círculo de Belas Artes
de Madrid, participou Berta Caro, directora de Desenvolvemento
Corporativo en Tecalis, que recibiu o recoñecemento de mans do
devandito instituto.
Segundo
fai saber Tecalis, o Premio á Excelencia Empresarial vén culminar
un ano ateigado de premios ao “exitoso modelo” de actividade da
empresa con sede en Milladoiro (Ames), baseado “na fusión da
innovación tecnolóxica coa innovación na excelencia”. Este
modelo de negocio, engade a firma galega, “está constituído ao
cen por cen por políticas de responsabilidade social corporativa,
excelencia empresarial e innovación continua, que buscan todas elas,
o benestar do persoal da compañía e máis da contorna social na que
se insire, mellorando a produción e a calidade dos proxectos e
aumentando os niveis de implicación, comunicación e fidelidade do
talento que conforma o capital humano de Tecalis.