TokApp consolida en 43 cidades a súa aplicación de mensaxería instantánea para o ámbito docente
mércores, 15 de abril do 2015
A empresa viguesa TokApp,
da que falamos
en Código Cero para dar conta da súa ferramenta global de
comunicación empresarial, está a consolidar en case medio cento
de cidades un novo (e innovador) recurso para emendar atrancos no
fluxo de coñecemento e información entre centros educativos,
comunidades de docentes, de pais e de alumnos. A ferramenta en
cuestión chámase TokApp
School e é unha aplicación destinada tamén a evitar calquera
tipo de incidencia comunicativa, ao tempo que achega rapidez e
eficacia no intercambio de datos, contidos, mensaxes. Ten feitura de
plataforma de mensaxería instantánea sen límites.
Segundo nos contan os
seus creadores, a súa orixe está na constatación de que
actualmente non hai moitos recursos específicos (por non dicir
ningún), no panorama tecnolóxico-educativo, que lles asegure aos
escolares un método fiábel e eficiente para facer cousas como
avisar aos seus pais de actividades relevantes do centro ou de
entregar unha circular. Ou ben para que os centros informen aos pais
das faltas de asistencia dos seus fillos.
A aplicación, que
segundo engaden está xa presente en 43 cidades españolas, permite
aforrar tempo e material como cartas ou circulares, “que poden
extraviarse de camiño a casa”, explican. Ademais, achega a
peculiaridade de posibilitar aos usuarios saber en que momento, con
data e hora exacta, os destinatarios dunha mensaxe dérona lido.
Segundo conta Javier
Romero, fundador de TokApp, a aplicación ten ás súas costas “máis
de dous anos de desenvolvemento e investimento propio”. Agora,
engade, é a quenda de seguir traballando para levar a iniciativa a
novas cidades e seguir medrando nas que “xa estamos presente”. Ao
longo de 2015, o obxectivo é chegar a máis de dous centos de
cidades do ámbito estatal.
Salvagarda de
información
Amais do devandito, os
creadores de TokApp School non queren deixar de salientar a
capacidade da súa aplicación, “a diferenza do que acontece con
outras apps de mensaxería instantánea”, para preservar os
datos persoais tanto de pais e alumnos como dos docentes, polo que
non é preciso revelar o número de teléfono para rexistrarse, nin
se visualizará durante as mensaxes. Así, as respostas que se envíen
a unha notificación soamente poderán ser lidas polo emisor desta.
A aplicación, de
descarga gratuíta e baixo licenza de uso para o centro educativo,
permite enviar calquera tipo de arquivo como fotografías, vídeos ou
documentos en formato pdf, amais de programar o seu lanzamento cando
se desexe, “unha vantaxe para os profesores”, advirten dende
TokApp, que lembran que os docentes poden planear as súas
informacións, así como xestionalas desde calquera parte do mundo.
Para pais e alumnos, a plataforma inclúe servizos de ofertas do
sector educativo, entre eles, librarías, logopedas e academias de
ensino.
Sinalar tamén que TokApp
School ten a mesma validez legal que un burofax. “A plataforma está
avalada por un despacho de avogados que confirma que os servizos
prestados son legalmente recoñecidos, cumprindo as normas de
seguridade e privacidade para unha correcta comunicación entre os
usuarios”, explican os seus creadores.