Trials Fusion sairá á venda o 16 de abril

xoves, 27 de febreiro do 2014 Marcus Fernández

Os xogos de acrobacias sobre dúas rodas están a gozar de grande éxito baixo as marcas Trials HD e Trials Evolution, e de cara á nova xeración de consolas continúan a evolucionar, e así confirma que o vindeiro 16 de abril teremos o xogo Trials Fusion para PlayStation 4, Xbox One, Xbox 360 e PC, mesturando a fórmula dos seus predecesores con novidades sociais e gráficos de nova xeración.
Trials Fusion ofrecerá un mundo repleto de alta tecnoloxía, un sistema de trucos e físicas FMX e moitas outras novidades que poderán gozarse tras adquirir o xogo mediante descarga dixital (que en EE.UU. custará 19,99 dólares) ou en soporte físico (neste caso só para Xbox One, PS4 e PC a un prezo de 39,99 dólares, que está xustificado por incluír un pase de tempada).