Triesfera, Libolis e Tastelab mostran en Lugo a vitalidade do emprendemento feminino
luns, 26 de novembro do 2018
As
mulleres están chamadas a ser as grandes impulsoras do noso tecido
innovador e do noso novo emprendemento. Todos os indicadores apuntan
cara ao mesmo. Así o entenden tamén o Concello de Lugo (a través
da Concellería de Economía que dirixe Ana Prieto) e a Asociación
de Mulleres Empresarias, que
queren visualizar todo este potencial das nosas emprendedoras na
xornada Mesa Talento en Feminino. A cita será este día 30 de
novembro, a partir das 10.30 horas, no CEI Nodus.
Participarán
como relatoras tres emprendedoras de éxito: Mónica Pérez,
fundadora de Triesfera, unha
empresa de deseño e impresión en 3D que saíu do plan de apoio ao
emprendemento Inicia Coworking do Concello; Noemí Bellas, fundadora
de Libolis, a primeira escola
de emprendemento para nenas e nenos de Galicia (e un dos principais
puntais dos obradoiros de tecnoloxías e robótica Crea R); e Maruxa
García, xerente e cofundadora de Tastelab,
a primeira empresa de tecnoloxía de análise sensorial de España,
spin-off do Campus Terra.
Segundo
fai saber a Concellería de Economía, a asistencia á Mesa Talento
en Feminino é de balde. Conta con 30 prazas e as persoas interesadas
en inscribirse poden facelo chamando ao número de teléfono
982.22.69.91 ou enviando un correo electrónico a
empresariaslugo@gmail.com
A
concelleira de Economía, que presentou a xornada xunto á presidenta
de Mulleres Empresarias, Beatriz Varela, integrantes deste colectivo
e unha das relatoras, Mónica Pérez, salientou o “espírito
innovador e emprendedor da asociación” e lembrou o importante eido
no que traballa, onde conflúen ciencia, innovación, emprendemento,
cultura, coñecemento e, por suposto, feminismo: “Hai moitas
mulleres con talento que historicamente foron ocultadas pola
sociedade, como por exemplo a actriz de cine e inventora Hedy Lamarr,
co-autora nada máis e nada menos que da tecnoloxía na que se basea
o Wi-Fi moderno”. Segundo fixo saber, mesas como a organizada para
este 30 de novembro contribúen a visualizar e tamén son “unha
homenaxe a todas aquelas mulleres innovadoras, talentosas que
contribuíron e contribúen a que avance a sociedade”.