Un OMV ofrece chamadas e datos ilimitados no móbil por 25 euros/mes

Levamos un tempo no que as tarifas móbiles con datos ilimitados non son unha fantasía, pero os seus prezos continúan a ser bastante elevados, de aí que sorprenda bastante a chegada de Oléphone, un operador móbil virtual (OMV) que nas súas tarifas móbiles ofrece chamadas ilimitadas ás que poden sumarse datos acumulables (7, 10 ou 20 GB/mes por 7,5, 9,5 e 14 euros respectivamente) ou incluso datos ilimitados por 25 euros/mes, converténdose nunha das ofertas máis agresivas do mercado.
O servizo móbil de Oléphone chega a través da rede de Vodafone, e limita a súa velocidade de datos a 4G+ comprometéndose o usuario a un uso responsable do servizo, ou sexa, que non está permitido o uso destas tarifas de datos móbiles con routers ou empregando o móbil como punto de acceso (o que claramente fai difícil que poida realizarse un consumo de datos elevado).
Oléphone tamén ofrece servizos de fibra óptica a velocidades de 100, 300 e 600 Mbps simétricos e teñen previsto ofrecer máis adiante servizos de telefonía fixa e televisión.
Agora o que resta é ver se outras compañías reaccionan, e ofrecen tarifas planas de datos móbiles a prezos axustados de xeito xeral e non só en ofertas puntuais.