Un catalán deseña un curioso reprodutor de Spotify

luns, 14 de febreiro do 2011 Marcus Fernández

Como alternativa á descarga de música está a ter bastante éxito a plataforma Spotify, pero este servizo de música mediante streaming parece cinguirse a ordenadores e teléfonos móbiles avanzados, de aí que resulte moi interesante que o barcelonés Jordi Parra (quen estudou Enxeñaría en Deseño de Produtos en Barcelona e cursa actualmente un master no Instituto de Deseño de Umeå en Suecia) desenvolvese un radiotransmisor moi básico que permite a reprodución das nosas listaxes musicais en Spotify, para o que se basea en tecnoloxía RFID. O trebello pode conectarse por USB ao PC para a sincronización de listaxes de reprodución, contando con botóns para saltar entre as cancións anterior e seguinte, así coma dun regulador de volume.
As imaxes do produto son realmente rechamantes, aínda que cómpre destacar que estamos a falar dun concepto e non dun produto que vaia chegar ás tendas en tal formato tan artesanal, que de ser producido en serie podería custar uns 50 dólares, o que é bastante menos que o que custan solucións semellantes de fabricantes actuais.
Para ver o funcionamento deste curioso prototipo podemos botar un ollo ao seu vídeo de presentación no que deixan claro que estamos ante un concepto orixinal e divertido, que aínda que non chegase a venderse de xeito masivo, demostra que é posible innovar neste eido:

PUBLICIDADE