Un hacker romanés converteu computadores da NASA en espazos de chat

martes, 5 de decembro do 2006 Fernando Sarasketa

Para entrar sen estarmos previamente convidados hai casas e casas, e a da NASA probablemente figure nalgunha listaxe “non oficial” de espazos de “alto interese turístico”, sobre todo entre a comunidade hacker.
Precisamente a esta comunidade é á que pertence o mozo romanés Victor Faur (22 anos), presunto pirata informático que vén de ser acusado pola Axencia Espacial Americana por ter entrado sen permiso nos seus sistemas informáticos, segundo informa a policía romanesa. As andainas de Faur na NASA consistiron basicamente en conseguir que os equipos informáticos da axencia operasen como espazos de chat.
A finalidade de todo isto? Abrirlle novas portas ás posibilidades da comunicación, ó permitir que os restantes membros do grupo de hackers (chamado en certos ambientes WhiteHat TeaM) tivesen diálogos cruzados.
Os computadores que foron visitados polo mozo romanés contiñan información de valor para a NASA. De feito, albergaban datos sobre programas espaciais e novos proxectos tecnolóxicos, polo que é de supoñer que as medidas de seguridade eran certamente rigorosas.
Segundo a Xustiza de EE UU, os danos que Faur podería ter causado á axencia chegarían ós 1,3 millóns de dólares, delito que naquel país pode ser castigado con até 54 anos na cadea.
Sexa como sexa, o mozo non poderá ser levado perante a Xustiza norteamericana, xa que no acordo sobre extraditación asinado con Romanía non se ten incluído apartado algún sobre que se fai con delincuentes tecnolóxicos.

PUBLICIDADE