Unha mesa cadrada no FKM dirixe a mirada a unha futura industria galega do videoxogo

A mesa cadrada do FKM desenvolveuse no Forum Metropolitano da Coruña

A edición deste ano do Festival de Cinema Fantástico da Coruña, o FKM, contou esta mañá cun espazo reservado ao mundo dos videoxogos, máis concretamente en Galicia, a través dunha mesa de debate moi heteroxénea na que participaron os tradutores Ramón Méndez e Alba Calvo, os desenvolvedores independentes José Garnelo e Pilar Cela, e o co fundador de Gato Salvaje Studio, Sergio Prieto, que moderados por Marcus Fernández (Código Cero) compartiron as súas experiencias ante un auditorio ateigado, demostrando o grande interese que hai pola proxección profesional que pode supor este sector aínda emerxente.
Ramón Méndez e Alba Calvo, quen traballaron na tradución de máis de 450 e 300 proxectos cada un, deixaron constancia da complexidade que supón a localización de videoxogos, destacando o feito de que a adaptación a distintas linguas non debe verse como un gasto senón como un investimento, xa que ten un reflexo directo nas vendas, tanto ao abrir mercados como ao achegarse a públicos que senten rexeitamento polos xogos que non estean dispoñibles na súa lingua.
José Garnelo de Fosfatina quixo achegar os seus desenvolvementos independentes en forma de aventuras gráficas, explicando un chisco como son os seus procesos creativos e fontes de inspiración; mentres que Pilar Cela de Trum Room deu conta das súas aventuras gráficas, como un xeito de desenvolver a súa creatividade facendo realidade títulos nun xénero co que ten grande afinidade, o que quixo deixar claro ante o auditorio ao declarar que xoga cando menos unha vez ao ano ao clásico Day of the Tentacle.
Con Sergio Prieto de Gato Salvaje Studio púidose abordar tanto o que supón a posta en marcha dun estudio de videoxogos en Galicia, como as dificultades para atopar profesionais especializados no medio, os grandes atrancos para emprender en España e a reducida oferta formativa. Pero pese a todas as dificultades a visión de Prieto é optimista, e considera que o feito de que o sector estea a xermolar na nosa comunidade pode dar pé a que exista unha auténtica industria galega do videoxogo no futuro, sempre que se poñan facilidades para que a formación, a burocracia e o financiamento non sexan atrancos, e poidamos así crer un tecido produtivo nun sector no que si somos grandes consumidores.