Verín bota man de tecnoloxías GPS e QR para facilitar a experiencia dos turistas
venres, 4 de xaneiro do 2019
O
Concello de Verín presentou onte unha guía de servizos e de turismo
que abrangue as referencias e emprazamentos de meirande interese do
ámbito local a través das máis avanzadas tecnoloxías de
localización e información. A guía lanzouse en tres idiomas
(galego, castelán e inglés) e tira partido do xeoposicionamento GPS
e dos códigos QR para sinalar de xeito exacto os puntos de meirande
atractivo para os visitantes. A idea é facilitar ao máximo a
experiencia dos viaxeiros que se acheguen a Verín e ao concello.
Nun
plano máis detallado, a guía Servizos Novo Verín contén cousas
como o emprazamento exacto dos oito estacionamentos libres da vila,
incluído o reservado para camións. A través das indicacións
achegadas a través de códigos QR (e visualizadas coa axuda de
calquera das aplicacións móbiles dispoñíbeis para a súa
lectura), permítese aos visitantes chegar da maneira máis cómoda
aos devanditos destinos mediante o navegador de Google Maps.
Ademais,
en colaboración con AEHCOM, Aever e a Denominación de Orixe
Monterrei, contén un directorio de todos os seus asociados, e outros
teléfonos de interese.
A
maiores, inclúe a información necesaria para a promoción e
difusión dos balnearios reabertos nos últimos tres anos en Verín,
e tamén para o seu emprazamento telemático. É o caso dos
establecementos de Caldeliñas e Fontenova, que aparecen descritos
tanto polas súas propiedades como polo papel que xogaron na historia
da vila.
Outro
dos apartados da guía de servizos é a localización exacta de todos
os puntos limpos de Verín, 15 na actualidade, que eliminaron centos
de contedores das rúas e “que permiten realizar a separación sen
concentrar a recollida nas rúas”, sinalou onte o Concello,
engadindo que a guía dá acollida, tamén, aos novos espazos
urbanos, os novos parques temáticos e máis os terreos adquiridos
para as dúas grandes novas zonas verdes de Verín, A Preguiza e
Fontenova, xa de propiedade municipal.