Vilagarcía promoverá a Praza de Abastos nas redes a través dos Next Generation
venres, 27 de xaneiro do 2023
Dixitalizar
e dinamizar a Praza de Abastos é un dos obxectivos da Concellería
de Promoción Económica do Concello de Vilagarcía para o ano 2023.
Ao abeiro deste reto, poranse en marcha varias iniciativas. Unha
delas consiste nunha campaña de comunicación online a
desenvolver durante todo o ano. O seu obxectivo será “achegar
os servizos e produtos da praza a novos públicos e captar nova
clientela entre os sectores da poboación de menor idade, que son os
que frecuentan menos os mercados públicos”. A execución desta
iniciativa contratouse por importe de 12.450 euros (sen IVA) á
empresa Proimaxe.
A
campaña de comunicación online para a Praza de Abastos
enmárcase no programa Vilagarcía Viva, deseñado pola
concellería que dirixe Alba Briones para dinamizar o comercio de
proximidade e que obtivo financiamento europeo a través dos fondos
Next Generation. Esta medida en concreto corresponde á liña
relativa á transformación dixital, de aí que a campaña se centre
na promoción en liña. Esta consistirá no deseño e difusión a
través dos novos medios dunha serie de contidos para presentar e dar
a coñecer á cidadanía aos praceiros do mercado público, a
informar da ampla oferta que existe na Praza, dos produtos de
tempada, das propiedades nutricionais dos mesmos ou a propoñer
receitas ou ideas que realizar co xénero que ofrece o mercado. A
campaña secuenciarase en catro etapas a desenvolver ata finais de
2023 e contará cun boletín físico a modo de apoio ou complemento
da difusión online.
Ademais
do devandito, a Concellería de Promoción Económica vén de recibir
o proxecto técnico para dotar ao mercado municipal da instalación
fotovoltaica que permita ao edificio ser autosuficiente en materia
enerxética Nesta mesma actuación se inclúe a instalación de dous
estacións de carga para vehículos eléctricos.
O
proxecto está presupostado en 111.152 euros que tamén se financiará
cos fondos Next Generation, neste caso a través da liña relativa á
eficiencia enerxética que a UE promove para reducir as emisións de
CO2.