Vitae organiza en abril a 37 edición do seu curso sobre xestión de proxectos áxiles con Scrum
martes, 2 de marzo do 2021
Vitae
Consultores prosegue nesta inminente primavera achegando formación
dende a súa aula virtual, de gran interese para todo aquel
profesional (tecnolóxico ou non) que queira ampliar os seus
coñecementos sobre os cada vez máis vixentes (e urxentes) métodos
áxiles para o desenvolvemento de proxectos. Entre outros cursos,
Vitae convoca a 37º edición dunha actividade formativa que xa era
relevante en formato presencial, antes da crise sanitaria, e que
agora adquire novas cotas de universidade e repercusión co formato
online. Trátase
do Curso Dirección e Xestión de Proxectos TI Áxiles con Scrum.
Serán, novamente, 16 horas de adestramento sobre algúns dos
mecanismos de máis probada valía para garantir o éxito dun
proxecto tecnolóxico.
Desenvolverase
os días 5, 6, 8, 9, 12, 13, 15 e 16 de abril.
Vitae
explícanos así a vixencia deste curso: “Dada a situación
cambiante do mercado e a necesidade das empresas e os seus equipos a
adoptar medidas para satisfacer de xeito eficaz e rápido as
necesidades do cliente, proponse este curso sobre o uso de Scrum en
proxectos e desenvolvemento de software, unha metodoloxía que vai
permitir a implicación e auto-organización de todo o equipo para
fixar un punto de partida co que definir o proceso de execución do
proxecto”.
Segundo
recalcan dende Vitae Consultores, estamos ante unha actividade
formativa que nos pon ao día nas metodoloxías coas que aplicar
modelos de tráballo áxiles, uns modelos que engaden eficacia e
rendibilidade e que, a maiores, permiten que establezamos a meirande
proximidade cos clientes do proxecto no que estamos a traballar,
sabendo o que precisan en todo intre, mesmo anticipándonos ás súas
demandas e acadando a mellor comunicación posíbel.
Nun plano
máis detallado acerca do programa do curso, neste abordaranse as
diferenzas entre as devanditas metodoloxías áxiles e as súas
vantaxes e inconvenientes con respecto a metodoloxías pesadas como
CMMI, PMI e ISO, “dando unha perspectiva global aos asistentes para
que adquiran os coñecementos precisos para seleccionar a metodoloxía
de dirección segundo as necesidades de cada proxecto”.
A
encargada de impartir estes contidos será novamente Josefina Alonso
Nocelo, enxeñeira superior en Informática e na actualidade
coordinadora de Proxectos e responsábel de Seguridade da Calidade do
Desenvolvemento de Software na dirección de Electrónica HMI do
Centro Tecnolóxico de Automoción de Galicia, o CTAG. Josefina
Alonso, ademais, posúe unha ampla experiencia nos eidos do
desenvolvemento de software e do asesoramento empresarial e a centros
de I+D (traballou para a Axencia Europea do Espazo, o CTAG, o CITIC,
Tecnocom, SIVSA, Seresco, Coremain ou Balidea, entre outras moitas
entidades).