Xa se poden presentar solicitudes para o Hospital de Emprendedores de Ourense
mércores, 20 de maio do 2020
O
Hospital de Emprendedores promovido pola Deputación de Ourense
recibiu esta semana un novo impulso. Foi
da man do presidente da entidade provincial, Manuel Baltar, que este
martes visitou a sede do Centro Cultural Marcos Valcárcel, que
acollerá a partir do primeiro de xuño o devandito acubillo de novos
negocios, unha iniciativa do propio Baltar para mitigar as
consecuencias da crise sanitaria no tecido produtivo provincial,
achegando a autónomos e pequenos empresarios, durante tres meses,
espazos de oficina e equipamentos tecnolóxicos para que poidan
desenvolver dende alí o seu labor. A iniciativa xa ten aberto o
prazo de solicitudes de espazo, ben no Rexistro Xeral da Deputación
ben a través da web da institución.
O
Hospital de Emprendedores, concibido para “axudar a emprendedores e
empresarios que non poden pagar alugueres e que ven perigar a súa
actividade laboral por mor da crise do coronavirus”, terá o
seguinte horario de actividade: de 8.30 a 14.00 horas e de 16.00 a
20.00 horas de luns a venres, entre o 1 de xuño e o 31 de agosto.
A
empresa R, do Grupo Euskaltel, colaboradora tecnolóxica desta
iniciativa solidaria, comezou xa a traballar neste proxecto para
garantir que a conexión a Internet avanzado de alta velocidade por
fibra óptica para os usuarios do Hospital de emprendedores.
O
Hospital habilitará espazos para 40 postos de oficina, cada un dos
cales disporá de conexión a Internet e mobiliario básico de
oficina, instalado cumprindo a normativa de seguridade referida á
prevención do COVID-19.