Xiaomi entra no mercado dos televisores de alta gama
venres, 3 de xullo do 2020
Cada vez temos máis claro que, aínda que Xiaomi é unha marca
que podemos asociar a smartphones de prezo moi axustado, cando falarmos doutros
produtos non sempre é posible ter prezos tan agresivos e competitivos, como
acontece no mercado dos televisores, no que a marca chinesa ten problemas para
ter éxito fóra do seu territorio, no que veñen de anunciar o seu primeiro
televisor de alta gama: o Mi
TV Lux 65” OLED.
Este novo televisor de 65 polgadas, cun panel OLED 4K con velocidades de
refresco de até 120 Hz (pensando no seu uso para videoxogos de consolas da
vindeira xeración, para os que tamén conta cun modo de baixa latencia), con
soporte de HDMI 2.1 e incluso cun son de calidade conseguido grazas a 9
unidades de altofalante que combinados achegan unha saída de 65 watts con
soporte de Dolby Atmos.
O novo televisor impresiona coa calidade do seu panel, que ofrece unhas cores
moi fieis e unha boa luminosidade, grazas a un panel OLED que permite gozar ao máximo
de contidos HDR10+ Dolby Vision HDR, HDR10 e HLG; e tamén sorprende pola incorporación
de NFC no seu mando a distancia, de xeito que con achegar un smartphone compatible
pode proxectar a pantalla do teléfono no televisor.
Este televisor de marcos reducidos tamén conta con widgets de reloxo, predición
meteorolóxica e outras informacións de interese por se o usuario quere utilizar
a función de pantalla Always-On. O Mi TV Lux 65” OLED sae hoxe mesmo á
venda a un prezo de 12.999 iuans (1.638 euros), cantidade que sería difícil de
imaxinar que alguén fose pagar por un produto dunha marca tan asociada ao baixo
custo, pero que cada vez atrévese máis a lanzar produtos de alta gama.