YouTube Premium sube de prezo en España

Entre os usuarios de YouTube que pagan por non ter publicidade na plataforma de vídeo hai un grande malestar en España tras a importante suba de prezo do servizo YouTube Premium, que no seu plan individual pasa de 11,99 a 13,99 euros/mes, mentres que o plan familiar pasa de 17,99 a 25,99 euros/mes (os estudantes manteñen o prezo de 8,99 euros/mes).
Cómpre salientar que este servizo te, como principal prestación, o eliminar a publicidade, xa que os contidos son de cadanseu creador e non producidos por YouTube, de aí que resulte rechamante que Google queira cobrar o mesmo que o plan Estándar de Netflix.
A subscrición inclúe algunha vantaxe adicional, como a posibilidade de descargar contidos para consumilos fóra de liña, a reprodución de contido en segundo plano (coa pantalla bloqueada ou mentres se emprega outra aplicación) e a posibilidade de gozar de YouTube Music, aínda que o principal reclamo é claramente a supresión da publicidade, que cada vez parece máis intrusiva e insistente.
Aínda que a suba de prezo do plan individual é bastante importante, no caso do plan familiar é moi esaxerada (dun 44%), dando a impresión de que Google está a buscar que os usuarios se dean de baixa do servizo de pagamento para consumir publicidade masivamente.