Código Cero - Diario Tecnolóxico de Galicia

Vitae mostra aos propietarios de produto como usar a IA para aumentar en axilidade

S. P. — 2026-05-19T09:35:16Z

Esta primavera proseguen as actividades formativas de Vitae Consultores, referente galego e estatal na transformación tecnolóxica das empresas e na adaptación das e dos profesionais aos novos xeitos (máis eficaces, eficientes, áxiles e produtivos) de traballar, comunicarse ou xestionar recursos. Precisamente a axilidade será un dos piares temáticos do Curso en Aberto Axilidade Avanzada: IA aplicada a Product Owners, que celebra Vitae os días 16 e 18 de xuño en formato de aula virtual, con seis horas lectivas.
O curso porá o foco na figura product owner ou propietario de produto, o rol clave na metodoloxía Scrum que se encarga de maximizar o valor dun produto.
A idea é facilitar o seu día comezando pola información: “Vivimos nunha contorna onde os product owners reciben máis información que nunca: feedback de usuarios, métricas, opinións de stakeholders… pero transformar todo iso en decisións claras segue sendo un reto”, informa Vitae, puntualizando que o dito desafío pode abordarse botando man da intelixencia artificial xenerativa, que “abre unha nova forma de traballar”.
De feito, nesta formación práctica aprenderemos a utilizar ferramentas como ChatGPT, Gemini ou Copilot para analizar feedback, descubrir valor real, xerar hipótese de produto e construír un product backlog con criterio.
Ademais, poderemos ir un paso máis aló: “Aprenderemos a deseñar prompts efectivos e a crear os teus propios asistentes de IA adaptados ao noso día a día como product owner; e todo iso a través dun caso práctico realista onde traballaremos como PO desde o primeiro minuto”, engaden dende Vitae.

Obxectivos

-Utilizar IA xenerativa para analizar feedback de usuarios e detectar problemas reais.
-Transformar problemas en hipóteses de produto con valor.
-Crear historias de usuario claras e estruturadas.
-Construír e priorizar un product backlog con criterio.
-Deseñar prompts efectivos utilizando técnicas como Zero-shot, Few-shot, Chain of Thought, etc.
-Crear asistentes de IA personalizados para o traballo como product owner.
O curso vai dirixido a product owners que queren mellorar a súa capacidade de decisión e priorización, especialistas en Scrum que desexen entender como aplicar IA en produto, xestores de produto e perfís de negocio involucrados en decisións de produto, e equipos áxiles que queiran incorporar a IA no seu día a día.

Formadores

Pío Puig
Pío Puig é un consultor e formador especializado en transformación organizativa, cunha traxectoria centrada en axudar a equipos a tomar mellores decisións e xerar impacto real. A súa traxectoria combina unha base técnica sólida —enxeñeiro e MBA— cunha evolución cara ao desenvolvemento do talento, o que lle permite moverse con solvencia entre o mundo tecnolóxico e o humano. Traballou en contornas de Data Science e Machine Learning, aplicando IA en contextos reais de negocio. O seu enfoque combina criterio de produto, pensamento estratéxico e uso práctico de IA xenerativa. Certificado en Agile e Scrum (PSM I, PAL I) e certificacións en IA aplicada de Microsoft e fundador de TalentUp! e Fast Innovation.

Susanna Miquel
Susanna Miquel é unha consultora estratéxica especialista en desenvolvemento de persoas, liderado e acompañamento a equipos. Con formación de base como arquitecta pola UPC, evolucionou a súa carreira cara ao ámbito organizativo, especializándose no desenvolvemento do talento e liderado consciente, o que lle permite achegar unha visión estruturada (enxeñería/arquitectura) combinada con enfoque humanista. O seu enfoque achega a dimensión clave en calquera proceso de innovación: as persoas, a aliñación e a capacidade real de executar. Conta con certificacións oficiais en Agile e Scrum (PSM I, PAL I) e certificacións en IA aplicada de Microsoft e é fundadora de TalentUp! E Fast Innovation.

Un de cada tres maiores de 75 anos xa usa Internet a diario

S. P. — 2026-05-19T08:25:37Z

A operadora Adamo vén de compartir datos sobre a evolución positiva do uso das novas ferramentas tecnolóxicas entre a poboación sénior, unha franxa de idade que ten un especial protagonismo entre a súa clientela, xa que Adamo é unha operadora moi envorcada no rural (no rural de Lugo xa está preto de cubrir o 90% dos concellos coa súa rede ultrarrápida de alta velocidade, abranguendo máis de 100.000 fogares xa).
Adamo lembra que os datos demostran que “as persoas maiores non queren quedarse atrás na súa incorporación á tecnoloxía” e que así o constatan os máis recentes datos ofrecidos polo Instituto Nacional de Estatística (INE), relativos a 2025 e que Adamo analizou con motivo do Día da Internet, celebrado o pasado domingo, 17 de maio.
Deste xeito, un de cada tres maiores de 75 anos xa utiliza Internet a diario, tal e como indican desde o INE. Ademais, a porcentaxe dispárase ao 83% na franxa de entre 65 e 74 anos.
Adamo recolle da información do INE que máis do 96% da poboación de 16 a 74 anos conectouse nos tres últimos meses (0,5 puntos máis que en 2024) e o 92,5% usouno acotío, ou sexa a diario (1,0 puntos máis). Pola súa banda, case o 60% mercou por Internet nos tres últimos meses por motivos particulares, 2,9 puntos máis que na enquisa anual precedente.
Por sexo, as mulleres presentaron porcentaxes lixeiramente superiores aos homes: 0,4 puntos máis no uso da internet nos tres últimos meses, 1,5 puntos máis no uso diario e 1,1 puntos máis nas compras en liña.
As comunidades autónomas con maior porcentaxe de usuarios da internet e de persoas que compraron na Rede nos tres últimos meses foron a Comunidad de Madrid (98% e 65%, respectivamente), Cataluña (case o 98% e 65% en cada caso) e Baleares (máis do 97% e preto do 64% en cada campo), segundo consta no estudo do INE que destaca Adamo.
Adamo co rural
A operadora aproveitou a celebración do Día de Internet para referendar o seu compromiso co rural, envorcando esforzos para lograr que a conectividade das vilas e aldeas poida aproximarse, ou mesmo poida igualarse, á que existe nas cidades.
A compañía xa ten conectados á súa rede de fibra óptica máis de 3,2 millóns de fogares de 2.400 municipios -preto de 1 de cada 3 concellos españois-, despregando máis de 70.000 quilómetros de fibra, sobre todo en localidades rurais da práctica totalidade das comunidades autónomas peninsulares.
Ademais, o obxectivo de Adamo non só é reducir a fenda dixital entre as zonas máis rurais e illadas e as áreas urbanas, “senón tamén facelo de maneira sostíbel, respectando e apoiando a contorna no que opera”.

PlayStation deixará de lanzar en PC os seus xogos narrativos

Redacción — 2026-05-18T20:00:00Z

: Nos últimos anos PlayStation puxo á venda para PC os seus grandes xogos para un xogador

Bloomberg asegura que Sony está a dar marcha atrás na súa política de publicar en PC os grandes xogos de PlayStation, recuperando unha estratexia centrada na exclusividade para consola que durante décadas definiu a marca. Os plans actuais pasan por manter en PlayStation 5 títulos para un único xogador como Ghost of Yotei ou Saros, abandonando a intención de levalos tamén a Steam e outras plataformas de PC. Esta información tería sido comunicada aos traballadores dos estudios de PlayStation por parte do seu director xeral, Hermen Hulst.
A mudanza suporía un cambio relevante respecto da política de publicación iniciada en 2020, cando PlayStation comezou a adaptar a PC algunhas das súas franquías máis recoñecibles, como God of War ou The Last of Us. Dende entón, a presenza de xogos de Sony en PC foi aumentando, aínda que cun calendario irregular e sen unha política especialmente clara sobre tempos de exclusividade ou compatibilidade entre plataformas.
As fontes consultadas aseguran que os xogos multixogador e de servizo continuarán apostando pola distribución multiplataforma. Proxectos como Marathon ou Marvel Tōkon seguirían chegando tanto a consola como a PC, mentres que as producións narrativas e centradas na experiencia individual quedarían ligadas ao ecosistema PlayStation.
Internamente existiría preocupación por un posible impacto negativo sobre a marca PlayStation e sobre as vendas de hardware. Parte dos directivos considerarían que lanzar os principais xogos en PC reduce o atractivo diferencial da consola, especialmente nun momento no que Sony prepara a transición cara ás futuras xeracións de hardware.
O rendemento comercial dalgúns lanzamentos recentes en PC tamén influiría nesta decisión. Varias adaptacións non acadaron as expectativas previstas, mentres que determinadas medidas, como a obrigatoriedade de empregar contas de PlayStation Network en títulos distribuídos a través de Steam, xeraron críticas entre os usuarios de PC.
O escenario competitivo tamén mudou nos últimos anos. Nintendo continúa apostando por unha política case totalmente pechada arredor de Switch e das súas franquías propias, mentres Microsoft evolucionou cara a unha estratexia claramente multiplataforma, publicando os seus xogos tanto en Xbox como en PC e, cada vez máis, tamén en PlayStation.
Outro elemento que estaría condicionando os plans de Sony sería a futura Xbox baseada en Windows que diversos rumores levan meses anticipando. A posibilidade de que a vindeira consola de Microsoft execute xogos de PC de maneira nativa abriría a porta a ver franquías históricas de PlayStation funcionando en hardware rival, un escenario que xeraría reticencias dentro da división de videoxogos de Sony.

Altia impulsa o novo portal institucional da Comunidad de Madrid

S. P. — 2026-05-18T20:00:00Z

A Comunidad de Madrid presentou o seu novo portal institucional, unha plataforma renovada en cuxa evolución tecnolóxica, deseño e desenvolvemento integral traballou directamente a empresa galega Altia.
Concretamente, a firma tecnolóxica de Oleiros abordou a renovación completa da experiencia dixital do portal, mellorando tanto a navegación e usabilidade para a cidadanía como a xestión de contidos para os equipos internos.
Ademais, levou a cabo a migración á última versión de Drupal e o desenvolvemento integral da nova plataforma.
O proxecto tamén incluíu un estudo específico orientado ao uso masivo do portal, co obxectivo de optimizar o rendemento e garantir a máxima concorrencia nun dos principais puntos de acceso dixital da Comunidad de Madrid. Como parte desta evolución, Altia integrou os desenvolvementos nunha infraestrutura tecnolóxica máis resiliente e con maior fiabilidade baseada en Openshift. Para isto, a empresa galega contou cun equipo multidisciplinar de máis de dez profesionais expertos en deseño, UI/UX, arquitectura Drupal, tecnoloxías de procura avanzada e integración continua.
Altia tamén amplicou IA nos procesos de desenvolvemento mediante modelos adaptados a este tipo de proxectos e tecnoloxías, “o que nos permitiu optimizar tarefas, axilizar procesos e mellorar a eficiencia nas distintas fases de construción e evolución de plataformas dixitais”, explicou a empresa, lembrando que a colaboración coa Comunidade de Madrid vén de antigo e remóntase a hai máis dunha década de colaboración en proxectos vinculados a portais dixitais e Administración Electrónica. “Durante este tempo, acompañamos a evolución tecnolóxica desde as plataformas anteriores ata a implantación e evolución de Drupal, consolidándonos como un dos socios tecnolóxicos de referencia neste ámbito”, apuntaron fontes de Altia, que, ademais de materializar o portal institucional, liderou iniciativas relacionadas con algúns dos principais portais da Administración madrileña, entre eles a sede electrónica, o BOCM, o Portal de Contratación, o Portal de Transparencia, a Sede Xudicial Electrónica e os máis de 30 portais hospitalarios da rexión.

X limita o número de publicacións que poden facerse ao día sen pagar

Marcus Fernández — 2026-05-18T19:30:00Z

: X detalla os novos límites de uso nas súas páxinas de axuda

Ao pouco de que Elon Musk tomase as rendas de Twitter foron moitos os cambios na plataforma consecuencia dos recortes a nivel de infraestrutura, como cando se chegou a limitar o número de chíos que podían lerse por día. Esta cantidade era diferente entre os usuarios de balde e os usuarios de pagamento, e aínda que esta medida se anunciaba como temporal, rematou converténdose nunha política de límites establecida.
Nos últimos tempos os límites de X eran de 500 mensaxes directas ao día, 2.400 publicacións/republicacións ao día, 400 seguidos ao día e tamén outros límites de seguimento doutras contas unha vez superados os 5.000 seguidos. Aínda que moitas destas limitacións son claramente razoables, e buscan principalmente evitar certas malas prácticas, a política de publicacións vén de mudar, e as novas limitacións poden resultar un problema para os usuarios máis activos, xa que a partir de agora as contas que non paguen pola verificación só poderán realizar 50 publicacións ao día e 200 respostas.
Aínda que os límites poden parecer bastante elevados para un usuario ordinario, pode haber momentos puntuais nos que resulte natural superalos e, no caso de empresas e medios de comunicación isto podería ser moi habitual, polo que practicamente se está forzando a moitos usuarios a pasarse a un plan de pagamento se non queren ver limitada a súa capacidade de interactuar en X. Estamos ante unha práctica que ningunha outra plataforma social xeralista ousou facer, polo que non sería unha sorpresa que finalmente se botasen a compañía de Elon Musk se botase para atrás de detectar que tal política ten un efecto pernicioso.

Carballo aposta pola creatividade cunha nova edición de campamentos tecnolóxicos de verán

S. P. — 2026-05-18T19:21:21Z

A Concellaría de Innovación de Carballo desenvolverá este verán unha ampla programación de campamentos tecnolóxicos na Aula CeMIT local, unha iniciativa enmarcada nos obxectivos do proxecto Talento km 0 (TALK0) e deseñada para que a rapazada de entre 7 e 14 anos desenvolva as súas competencias dixitais “dun xeito lúdico e práctico”, informou o Concello.
O obxectivo da proposta é “fomentar o pensamento lóxico, a creatividade e o uso consciente da tecnoloxía mediante o xogo e a experimentación”.
O concelleiro de Innovación, Iván Andrade, destacou a importancia desta oferta formativa: “O noso obxectivo é que a mocidade de Carballo non sexa só consumidora de tecnoloxía, senón que aprenda a ser creadora, proporcionándolles ferramentas que lles dean autonomía e seguridade no mundo dixital actual”.
A oferta divídese en catro campamentos independentes de 10 días de duración cada un, con grupos reducidos dun máximo de 14 alumnos/as para garantir unha atención personalizada:
-Pequenos exploradores (7-8 anos): un primeiro contacto coa tecnoloxía a través de historias dixitais, debuxo, animación e robótica básica.
-Futuros exploradores (9-10 anos): centrado na programación visual con Scratch e o deseño de videoxogos sinxelos.
-Futuros makers (11-12 anos): introduciranse conceptos máis avanzados como o deseño 3D e a intelixencia artificial para nenos/as.
-Makers avanzados (13-14 anos): orientado a adolescentes, con contidos sobre edición de vídeo, creación de páxinas web e ciberseguridade.
Os campamentos desenvolveranse de 10:00 a 13:00 horas, de luns a venres, nas seguintes datas: Pequenos exploradores: do 6 ao 17 de xullo; Futuros exploradores: do 20 ao 31 de xullo; Futuros makers: do 3 ao 14 de agosto; e Makers avanzados: do 17 ao 28 de agosto.
Cada participante poderá inscribirse nun único campamento, e terán prioridade aquelas persoas que non asistiran en edicións anteriores. O prazo estará aberto a partir do luns 18 de maio ata esgotar prazas. As familias interesadas poden anotarse a través da páxina web da Aula CeMIT ou nas oficinas municipais do segundo andar do Fórum Carballo.

Desestiman a demanda de Elon Musk contra OpenAI

Redacción — 2026-05-18T17:50:52Z

Un xurado de California desestimou por unanimidade a demanda presentada por Elon Musk contra OpenAI, Sam Altman, Greg Brockman e Microsoft, ao considerar que as reclamacións foron presentadas fóra do prazo legal establecido.
O litixio xiraba arredor da transformación de OpenAI nunha estrutura con fins lucrativos. Musk acusaba os seus antigos socios de «roubar unha organización benéfica» mediante a creación dunha filial comercial arredor do laboratorio de intelixencia artificial, argumentando que se traizoara a misión orixinal da entidade de desenvolver IA para beneficio da humanidade. O empresario aseguraba tamén que Altman o enganara ao aceptar as súas achegas económicas e modificar posteriormente a orientación da organización.
Durante o xuízo analizouse en profundidade a relación entre os fundadores de OpenAI e os compromisos asumidos nos primeiros anos da entidade, mais o xurado concluíu que os posibles prexuízos sufridos por Musk producíranse antes do límite temporal permitido pola lexislación para presentar este tipo de demandas.
A xuíza Yvonne Gonzalez Rogers asegurou tras coñecerse o veredicto que existían probas abondosas para apoiar a decisión do xurado e que estaba preparada para arquivar o caso inmediatamente.
O proceso converteuse nun dos principais focos de presión xudicial sobre OpenAI nun momento clave para a compañía, que prepara unha posible saída a bolsa. Coa resolución do caso desaparece tamén unha das principais ameazas legais sobre a reorganización empresarial da compañía responsable de ChatGPT.

PlayStation Plus inicia unha suba de prezos

Marcus Fernández — 2026-05-18T17:35:16Z

No actual escenario de subas de prezo no mercado dos videoxogos sorprende pouco que Sony anuncie un cambio nas condicións do servizo PlayStation Plus, que a partir do mércores mudará subirá de prezo para novos subscritores, de xeito que a súa cota mensual pasará a custar un mínimo de 9,99 euros, mentres que a subscrición trimestral máis económica custará 27,99 euros. Cómpre salientar que, polo momento, os actuais subscritores non están suxeitos ao cambio de prezo.
Sorprende bastante o anuncio realizado con tan pouca antelación aducindo as condicións do mercado actuais (argumento que no ámbito dos videoxogos viña empregándose para o hardware, non para os servizos), aínda que tamén cómpre indicar que a suba é moderada (1 euro ao mes).
Un motivo que podería xustificar o momento do cambio de condicións de PlayStation Plus sería que é medio ano antes do lanzamento de Grand Theft Auto VI, forzando a que os xogadores do que promete ser o título máis importante do ano estean afectados polo novo marco de prezos.

Datos persoais de centos de milleiros de usuarios de autoescola poderían terse filtrado

Redacción — 2026-05-18T17:01:37Z

Unha presunta brecha de seguridade en Matferline, un dos principais provedores tecnolóxicos do sector das autoescolas en España, podería ter exposto os datos persoais de 703.450 estudantes segundo unha alerta difundida pola conta especializada en intelixencia de ameazas Hackmanac, que atribúe o ataque ao actor coñecido como macaroni e apunta ao uso dunha vulnerabilidade de inxección SQL (SQLi) para acceder ás bases de datos da compañía.
A información filtrada incluiría nomes completos, números de DNI, enderezos de correo electrónico, teléfonos móbiles, nomes de usuario, fotografías de perfil e mesmo contrasinais almacenados en texto plano. O incidente permanece pendente de verificación oficial, pero a gravidade potencial da filtración situou o caso no foco da comunidade de ciberseguridade.
Matferline ocupa unha posición central no ecosistema tecnolóxico das autoescolas españolas. Os seus sistemas serven de base para plataformas de test teóricos, software de xestión e materiais didácticos empregados por milleiros de centros de formación viaira. Isto implica que unha vulnerabilidade nun único provedor podería traducirse nunha exposición masiva de datos distribuídos por practicamente todas as provincias do país.
O aspecto máis preocupante da suposta filtración é a presenza de contrasinais en texto plano. A ausencia de cifrado ou hash nas claves de acceso representa un incumprimento das prácticas básicas de seguridade informática, xa que facilita o acceso inmediato ás contas comprometidas e incrementa o risco de reutilización de credenciais noutros servizos.
A combinación de DNI, teléfono, correo electrónico e contrasinais crea un escenario especialmente delicado para os afectados. Os datos poderían empregarse para campañas de phishing altamente personalizadas, fraudes por SMS, roubos de identidade ou intentos de acceso automatizado a outras plataformas nas que os usuarios empregasen a mesma clave.
Ata o momento non transcendeu ningunha comunicación pública detallada por parte de Matferline sobre o alcance real do incidente nin sobre posibles medidas de mitigación. Tampouco consta unha confirmación oficial da autenticidade da base de datos presuntamente extraída polos atacantes.

O MEGA rende homenaxe este venres á música, aos videoxogos e ao espírito friki

S. P. — 2026-05-18T14:30:00Z

Este venres, 22 de maio, os seareiros da música e dos videoxogos teñen unha cita no MEGA (A Coruña) onde se xuntarán os devanditos dous mundos máis a gastronomía e o que se coñece como mundo friki.
En concreto, a partir das 21.00 horas o Museo de Estrella Galicia propón unha cea maridaxe inspirada no cinema, os videoxogos, a animación e a literatura de culto.
A cita consistirá nunha cea maridaxe con cervexas da casa e as mellores receitas a cargo de Terra Food, que contará, tamén, con música en directo, a cargo dunha mestra de cerimonias moi especial: a coñecida pianista e streamer Elesky, que conta con centos de miles de seguidores nas redes sociais.
A asturiana visitará de novo a Sala de Degustacións do Museo de Estrella Galicia para interpretar algunhas das bandas sonoras máis coñecidas do mundo do cinema e dos videoxogos máis relevantes da denominada cultura friki.
O menú incluirá pratos inspirados en iconografía recoñecible para os afeccionados ao lecer dixital e á cultura geek, con referencias a mundos postapocalípticos, dragóns ou aventuras espaciais. Entre as elaboracións figuran un ceviche acompañado dunha DDH Dobre IPA, langostinos en tempura de carbón activo ou unha costela glaseada con redución de Nuka-Cola, nunha combinación que mestura técnicas culinarias contemporáneas e estética inspirada nos videoxogos.
A actividade súmase na celebración mundial do Día do Orgullo Friki (internacionalmente celebrado cada 25 de maio).
A cita no Museo de Estrella Galicia da Coruña será este venres 22, a partir das 21.00 horas, e as últimas entradas están dispoñíbeis na web oficial do museo.

O FabLab ETSAC da UDC intégrase na rede internacional de laboratorios de fabricación dixital da MIT

S. P. — 2026-05-18T14:00:00Z

A Escola Técnica Superior de Arquitectura (ETSAC) da Universidade da Coruña presentou na mañá deste luns 18 de maio o FabLab ETSAC Coruña, o primeiro laboratorio de fabricación dixital da UDC integrado na MIT Fan Lab Global Network, unha prestixiosa rede mundial de laboratorios de fabricación dixital nacida como un proxecto de divulgación do Center for Bits and Atoms (CBA) do Instituto de Tecnoloxía de Massachusetts (MIT).
En palabras da UDC, esta integración supón “un fito para a escola e tamén para a Universidade” e sitúa á ETSAC entre “o reducido grupo de escolas de arquitectura españolas que contan cun laboratorio plenamente acreditado dentro desta rede internacional”.
Ademais, engadiron fontes da institución educativa coruñesa, “constitúe un dos dous únicos FabLabs activos de Galicia, convertendo á UDC nun nodo estratéxico para o desenvolvemento da fabricación dixital e da cultura maker no noroeste peninsular”.
A presentación tivo lugar na propia ETSAC, nun acto que contou coa participación da vicerreitora de infraestruturas e sustentabilidade da UDC, Sonia Vázquez, o vicerreitor de investigación e transferencia, Jerónimo Puertas, e o director da ETSAC, Miguel Abelleira, así como do director responsable do laboratorio, o docente do Departamento de Construcións e Estruturas Arquitectónicas, Civís e Aeronáuticas, José Antonio Vázquez.
O laboratorio naceu no curso 2013-2014 a partir da transformación do antigo obradoiro de maquetas da escola nun espazo de fabricación dixital avanzada, converténdose logo nunha infraestrutura de referencia en innovación, docencia e investigación aplicada á arquitectura e ao deseño e integrándose de forma transversal na actividade académica da ETSAC.
Actualmente, o FabLab participa en actividades docentes do Grao en Arquitectura, o Máster Universitario en Arquitectura, o Máster de Rehabilitación e o Máster de Formación Permanente en BIM da UDC, ademais de organizar cursos especializados en deseño paramétrico e fabricación dixital.
O FabLab ETSAC Coruña dispón de equipamento avanzado de impresión 3D, corte e gravado láser, fresado CNC, fabricación robótica e prototipado electrónico, ademais de 60 estacións informáticas con altas capacidades gráficas accesibles para alumnado e profesorado da ETSAC.
Entre os recursos técnicos do laboratorio destacan cortadoras láser, impresoras 3D, fresadoras CNC de gran e pequeno formato, sistemas de corte por fío quente controlado numericamente e un brazo robótico destinado a tarefas de fresado e fabricación avanzada.
O FabLab ETSAC Coruña é tamén membro fundador da recentemente creada Rede de Investigación Universitaria en Creación e Fabricación Dixital e participa activamente en proxectos e iniciativas de innovación colaborativa, tanto no ámbito académico como social.
Ao longo dos últimos anos colaborou con diversos grupos de investigación da UDC e participou en iniciativas como Coronavirus Makers Galicia ou a Bienal Internacional MUGAK de San Sebastián. Ademais, a acreditación acadada tras a participación de persoal investigador da ETSAC no programa internacional FabAcademy 2025 reforza a proxección internacional do laboratorio e abre novas oportunidades de cooperación e mobilidade académica.
A UDC destaca que “o laboratorio mantén tamén unha clara vocación de apertura á sociedade, seguindo os principios impulsados por Neil Gershenfeld desde o Center for Bits and Atoms do MIT, fundador da rede internacional de FabLabs”.

Unha charla na Coruña convida a distanciarse do algoritmo

Redacción — 2026-05-18T12:02:22Z

A comunidade de WordPress Coruña celebrará o vindeiro xoves 21 de maio ás 19.30 horas unha nova charla centrada en estratexias dixitais afastadas da dependencia dos algoritmos das grandes plataformas. O encontro terá lugar nas instalacións de WeKCo baixo o título Vender sen pensar no algoritmo.
A sesión correrá a cargo de Rodrigo Varela, responsable técnico e de marketing de El Amasadero, quen compartirá a súa visión tras máis de dúas décadas traballando no deseño de estratexias dixitais.
A proposta pasa por cuestionar a obsesión polas métricas, os cambios constantes nos algoritmos de redes sociais como Instagram ou as actualizacións do buscador de Google.
A charla pretende convidar os asistentes a reformular a súa relación coas plataformas dixitais, apostando por unha presenza en liña máis sustentable e menos condicionada polas modas e tendencias. Varela defende priorizar a imaxinación, atopar unha voz propia e adoptar métricas máis sensatas, evitando «as carreiras de tolos» por adaptarse continuamente aos cambios impostos polos algoritmos.
O encontro incluirá tamén o habitual espazo de networking posterior, acompañado de petiscos e bebidas. A organización lembra que as prazas son limitadas e recomenda realizar inscrición previa a través de Meetup.

A UDC e Nunsys Group abren a convocatoria das Bolsas Sof.ia para promover o talento feminino STEM

S. P. — 2026-05-18T11:17:41Z

Fomentar o talento feminino e espertar vocacións en disciplinas STEM entre alumnas de secundaria é o obxectivo das Bolsas Sof.ia by Nunsys Group, unha iniciativa da UDC xunto á compañía tecnolóxica Nunsys Group, referente en innovación e transformación dixital, enmarcada na súa estratexia de responsabilidade social corporativa que conta co apoio do almacenista tecnolóxico TD SYNNEX.
Cómpre sinalar que este programa vai dirixido a persoas con identidade de xénero feminina residentes en España que superen o segundo curso de bacharelato ou dun ciclo formativo de grao superior durante este ano académico e desexen cursar un grao universitario do eido tecnolóxico; e contará coa colaboración da UDC xunto a outras 6 institucións académicas de titularidade pública en España: Universidade de Castela-A Mancha, Universitat Jaume I (Castellón), Universidade de León, Universidade Pablo de Olavide (Sevilla), Universitat Politècnica de València e Universidade de Zaragoza.
O prazo de inscricións comezou o 15 de maio e permanecerá activo até o 15 de xuño ás 14 horas (hora peninsular española), a través da web de Nunsys.
“Coas Bolsas Sof.ia queremos contribuír á redución da fenda de xénero, acompañando ás futuras profesionais no seu desenvolvemento académico e laboral”, explicou Gabriel Barreiro, delegado en Galicia de Nunsys Group, no acto de sinatura do convenio de colaboración entre ambas as entidades. Desde a UDC salientaron o valor das alianzas universidade-empresa: “iniciativas como esta contribúen a atraer, xerar oportunidades e consolidar o talento feminino en titulacións STEM estratéxicas para o futuro da nosa sociedade”, sinalou Ricardo Cao, reitor da Universidade da Coruña.
Indo á cobertura destas Bolsas Sof.ia, sinalar que a súa adxudicación estará baseada en maior medida en criterios de excelencia académica detallados nas bases reguladoras e sufragará os custos de matrícula, ou importe equivalente en caso de gratuidade, de dous cursos académicos completos nunha titulación da Universidade da Coruña (a elixir polas beneficiarias) entre os Graos en Enxeñaría Informática, Ciencia e Enxeñaría de Datos; Enxeñaría Industrial; Enxeñaría de Tecnoloxías Industriais; Electrónica Industrial e Automática, Deseño Industrial e Desenvolvemento de Produtos, Enxeñaría Eléctrica; e Enxeñaría Mecánica e Intelixencia Artificial, que se inclúen no abano dos 17 graos científico-tecnolóxicos amparados polo programa. A renovación para o segundo ano requirirá que as bolseiras superen satisfactoriamente o 75% dos créditos do primeiro curso.
Alén do apoio económico, o programa achega un completo itinerario de acompañamento personalizado, que inclúe mentoría con empregadas do ámbito tecnolóxico de Nunsys Group e acceso a prácticas formativas remuneradas tras a superación do primeiro ciclo académico nalgunha das delegacións de Nunsys Group, facilitando a transición entre a contorna académica e o mercado laboral.

YouTube estende aos creadores unha tecnoloxía que detecta deepfakes

Marcus Fernández — 2026-05-18T10:49:41Z

YouTube leva dende finais do ano pasado probando unha tecnoloxía dentro do seu programa de partners que complementa ao seu sistema de detección de contidos que vulneran o copyright e que, en vez de buscar contidos copiados, detecta contidos semellantes, facilitando a localización de contido creado mediante IA no que se suplanta a identidade dos creadores, que así poden solicitar a súa retirada.
Esta tecnoloxía parece estar a resultar bastante efectiva, e para facilitar a eliminación de contido falso en YouTube, a plataforma está a ampliar paulatinamente a tecnoloxía de detección de contido semellante a todos os creadores que teñan máis de 18 anos de idade.
O sistema detecta contidos en YouTube nos que figuren persoas cunha cara semellante á do creador de cada canle, para que eles mesmos poidan comprobar se son contidos creados con IA suplantando a súa identidade, tras o que poderán solicitar a súa retirada, protexendo así a súa imaxe e tamén evitando que os seus seareiros poidan verse enganados por suplantadores.

Vídeo de presentación da tecnoloxía de detección de semellanzas en YouTube

Bizum Pay inicia a súa despregadura

Marcus Fernández — 2026-05-18T09:52:38Z

Numerosos medios de comunicación están a dar conta hoxe do lanzamento en España de Bizum Pay, a tecnoloxía que permitirá pagar con Bizum en establecementos comerciais físicos mediante tecnoloxía contactless, pero cómpre salientar que estamos a falar unicamente do disparo de saída dunha despregadura que non está previsto que se complete ata o outono.
Polo momento só hai unhas poucas entidades bancarias que soben ao carro de Bizum Pay (CaixaBank, Banco Sabadell, Bankinter e o Grupo Caja Rural) e só ofrecen o servizo a uns poucos clientes, e como mostra dixo temos que nin sequera na páxina web oficial de Bizum se fala de Bizum Pay, polo que podemos considerar que o novo servizo está aínda nunha fase de probas técnica.
Na práctica, case non existe ningún establecemento no que hoxe é posible pagar con Bizum Pay, e non está previsto a que esta tecnoloxía se normalice ata o outono, cando é de esperar que as entidades bancarias realicen unha importante campaña de comunicación, xa que son as impulsoras desta tecnoloxía que busca afastarse de Visa e MasterCard, entidades que cobran comisións das que as entidades europeas queren fuxir.

Conta atrás para a chegada da Zona Indie Dev a ExpOtaku A Coruña

S. P. — 2026-05-18T09:00:54Z

A menos dunha semana da súa celebración, comeza a conta atrás para a chegada da Zona Indie Dev de ExpOtaku A Coruña, que volverá os días 23 e 24 de maio en ExpoCoruña coa súa edición máis ambiciosa ata a data.
Tras confirmar máis de 50 videoxogos repartidos en 40 postos completamente ocupados, a organización da Zona Indie Dev adianta agora parte das actividades que se desenvolverán durante o evento, incluíndo torneos, desafíos, premios, sorteos e propostas participativas para o público.
Segundo confirmou a organización, a programación seguirá ampliándose ao longo da semana e poderá consultarse na web oficial de actividades.
Engaden que a falta de poucos días para o evento, a edición de maio de 2026 xa conta con distintas actividades paralelas organizadas tanto pola propia Zona Indie Dev como por algúns dos estudos participantes e centros de formación presentes no evento.
Torneos e competicións
Un dos grandes atractivos desta edición serán os diferentes torneos e desafíos competitivos abertos ao público. O centro de formación Liceo La Paz organizará un torneo de Decay, un boomer-shooter centrado en velocidade, movementos extremos e puntuación, onde os participantes deberán competir por entrar nunha gran final entre as catro mellores puntuacións do evento. O gañador obterá un vale de 10 euros para Steam.
Pola súa banda, Axóuxere Games celebrará un torneo do modo Acumula Puntos de Colours, onde os asistentes poderán competir por lograr a maior puntuación posible antes do peche da xornada do sábado. O gañador recibirá material promocional exclusivo do xogo.
Ademais, o estudo Widijou organizará varias actividades relacionadas con Golpes e Porrazos, incluíndo un Rei de Pista competitivo o sábado 23 e un torneo informal o domingo 24, ambos con premios especiais para os participantes.
Premios Zona Indie Dev
A Zona Indie Dev volverá contar cos seus premios oficiais, destinados a recoñecer o traballo e creatividade dos estudos participantes.
O evento contará con dúas categorías principais de premios:
-Favorito do Público, elixido polos asistentes tras probar distintos xogos da zona.
-Favorito da Zona Indie Dev, decidido mediante votación entre os propios estudos participantes.
En ambas as categorías entregaranse premios de primeiro e segundo posto, recoñecendo así a varios dos proxectos máis destacados do evento.
Todos os galardoados recibirán un trofeo conmemorativo desta edición, cun deseño de inspiración lovecraftiana, ademais de diferentes lotes de videoxogos. Estes premios incluirán unha ampla selección de títulos grazas ao apoio de Tesura Games, JanduSoft e Devilish Games.
Sorteos e participación do público
A organización confirmou tamén que a participación activa do público volverá ter un papel fundamental dentro da Zona Indie Dev.
Todas aquelas persoas que completen o Pasaporte Indie e participen nas votacións oficiais poderán acceder ao sorteo oficial da Zona Indie Dev, composto por 5 sorteos en total.
Estes premios incluirán videoxogos grazas ao apoio de Tesura Games, Devilish Games e JanduSoft, xunto con material promocional e produtos exclusivos doados polos propios estudos participantes.
Os sorteos celebraranse o domingo 24 de maio ás 14.00 en directo dentro do evento no escenario despois da entrega de premios
Ademais, algúns estudos participantes organizarán os seus propios sorteos independentes. Entre eles destaca Nine Bites, que regalará lotes de merchandising do seu videoxogo The Sample entre as persoas que proben a demostración e participen na súa actividade.
O Pasaporte Indie
Como parte das actividades do evento, os asistentes tamén poderán completar o Pasaporte Indie da Zona Indie Dev. Cada estudo participante contará cun selo dixital exclusivo asociado ao seu videoxogo. Os visitantes poderán desbloquealos escaneando códigos QR tras probar os diferentes xogos presentes na feira. A iniciativa busca “incentivar que o público descubra novos proxectos e percorrer toda a zona indie durante o evento, ademais de dar paso ao acceso á votación e con iso aos sorteos”.
Unha experiencia máis completa
A organización busca que a Zona Indie Dev non “sexa unicamente un espazo para probar videoxogos, senón tamén un lugar de encontro entre xogadores, prensa, creadores e profesionais do sector”.
A edición de maio de 2026 reunirá talento de toda Galicia e de distintos puntos de España, consolidando o crecemento que o evento experimentou durante os últimos anos.
Con esta programación paralela, a organización reforza a súa aposta por converter a Zona Indie Dev nun dos espazos máis activos dentro do evento.

O certame Dalle Like Galinfluencers celebrou en Lugo a gala final da súa 1ª edición

S. P. — 2026-05-18T08:00:00Z

A primeira edición dos Premios Dalle Like Galinfluencers celebrou este sábado 16 de maio a súa gala final no Círculo das Artes de Lugo, entre as 20.00 e as 23.00 horas, un acto dirixido a “reivindicar o talento galego nas redes sociais”. Contou cunha actuación de Lucía Pérez e unha festa posterior no Versus XL con DJ Kike Varela. Tamén participaron 10 puxantes cociñeiros galegos.
A gala foi un evento benéfico, no que se recadaron fondos para a Protectora de Animais de Lugo.
O certame tivo o apoio de institucións como a Deputación de Lugo, que achegou 3.000 euros para o seu desenvolvemento e o seu impulso.
O certame tamén contou co apoio da Secretaría Xeral da Lingua que dirixe Valentín García, e máis da Consellería de Medio Rural.
Como dixemos, os Premios Dalle Like, que viñeron na súa primeira edición con 10 categorías, buscaban recoñecer o talento galego no ámbito dixital e das redes sociais.
Entre os persoeiros que participaron gala atopábase o deputado de Promoción Económica e Social, Pablo Rivera Capón, que valorou das e dos participantes a “creatividade e as horas de traballo” que realizan para “conectar coa xente” e destacou especialmente a súas capacidades para “crear comunidade desde algo tan simple, e complicado ao mesmo tempo, como ter unha voz propia. Unha voz que gala desde Galicia, a provincia de Lugo, coa nosa forma de ver o mundo, coa nosa retranca, cultura e naturalidade de quen non necesita parecerse a ninguén para conectar”.
“Na Deputación de Lugo sentimos orgullo de apoiar unha iniciativa coma esta porque sodes persoas capaces de transformar unha idea en algo que conecta coa xente. E iso sempre merece recoñecemento”, engadiu o deputado, ao tempo que felicitou ás persoas que organizaron esta cita, así como aos nomeados e a todos os premiados.
O evento premiou aos mellores influencers en nove categorías diferentes: cultura, humor, moda, viaxes ou deportes, entre outros. Ademais, a programación estivo ambientada nunha romaría tradicional con postos dirixidos por 10 cociñeiros galegos.

A Aula CeMIT da Deputación de Pontevedra acolle en xuño un obradoiro para mellorar competencias dixitais

S. P. — 2026-05-18T07:43:53Z

A Deputación de Pontevedra acolle durante o mes de xuño na Aula CeMIT un obradoiro presencial destinado a facilitar o uso das novas tecnoloxías no día a día. Nesta ocasión, o obradoiro, baixo o título Crea contido con Intelixencia Artificial, celebrarase do 1 ao 4 de xuño en horario de 10.00 a 13.00 horas.
A acción formativa, de 12 horas de duración, permitirá aos asistentes aprender a empregar ferramentas de intelixencia artificial para xerar ideas orixinais, escribir textos, deseñar imaxes e crear vídeos profesionais en cuestión de minutos.
A través do obradoiro achegaranse as pautas e claves para crear contido de calidade co apoio da IA. As persoas interesadas en asistir poden inscribirse ata o 28 de maio na web do CeMIT.
Crea contido con Intelixencia Artificial é un taller totalmente gratuíto e desenvolverase na Aula CeMIT situada no Edificio Administrativo da Deputación na cidade de Pontevedra. A acción forma parte do programa YoConecto promovido pola Fundación Cibervoluntarios, con 15 prazas dispoñíbeis. Ao seu remate, as persoas participantes recibirán un certificado oficial.