A UVigo celebra o 8M reivindicando o papel da muller na robótica e na industria intelixente
martes, 8 de marzo do 2022
Mar Masuli, Pepa Sedó, Carolina López ou María Benítez, son
algunhas das mulleres que traballan ou estudan no sector da
automoción e da robótica, e que este luns 7, véspera da
celebración do Día Internacional da Muller, foron
as protagonistas da terceira edición das Xornadas técnicas
AER-UVigo. Unha actividade que nesta ocasión puxo énfase en
proxectar o papel das mulleres en sectores nos que a presenza
feminina segue a ser minoritaria.
A vicerreitora de Investigación, Belén Rubio, recalcou que todas as
mulleres son pionerias e verdadeiros exemplos a seguir. Xunto a ela
tamén participaron outras personalidades como, Alex Salvador,
xerente da Asociación Española de Robótica e Automatización
(AER); Salvador Giró, presidente de AER Automoción, e Abel
Caballero, alcalde de Vigo. Todos eles destacaron a importancia de
que as mulleres se sumen a carreiras STEM xa que se trata de sectores
que nun futuro as ofertas de traballo non van deixar de medrar.
A mesa redonda, que se celebrou de xeito virtual, contou coa
participación de Ainoa Castro e Noemí Rabasco, estudantes de
Electrónica Industrial e Automática, e Automatización e Robótica
Industrial na UVigo, respectivamente. Tamén participaron mulleres
directivas de diferentes empresas asociadas a AER Automation. Por
outra banda, Antía Fernández, directiva do Centro Tecnolóxico
Gradiant, encargouse de exercer como moderadora. Estas, puxeron en
común experiencias, relataron os seus procesos de formación,
comentaron como o eido laboral está fortemente masculinizado e tamén
concretaron que “hai ofertas laborais nas que de cada trinta
currículos, só un é de muller”.
Todas elas son enxeñeiras ou xornalistas que dende sempre, as súas
traxectorias estiveron ligadas ao mundo da industria 4.0 e da
Intelixencia Artificial, sectores que como elas destacan, son
presente e futuro na inmensa maioría de actividades industriais.