AOC fabricará o primeiro ordenador todo-en-un con Remix OS 2.0

A adaptación de Android a ordenadores persoais a través de Remix OS parece ter sido todo un acerto, e aínda que Android sexa un sistema orientado a dispositivos táctiles e portátiles compórtase relativamente ben con interfaces tradicionais como o teclado e o rato, de aí que a compañía responsable de Remix OS, Jide, decidise pechar un acordo con AOC para lanza o primeiro ordenador de escritorio con esta versión de Android, o AOC Mars, que está a deixarse ver estes días no CES Asia que se celebra en Shanghai (China) e que ten previsto o seu lanzamento chinés no verán (para o resto do mundo aínda non se sabe se ousarán a vender este curioso equipo).
O AOC Mars é un ordenador todo-en-un cunha pantalla Full HD de 23,8 polgadas (cun grosor de só 9,9 milímetros), procesador ARM Cortex A53 de 64 bits e a 2 GHz (capaz de reproducir vídeo en 4K), con 2 GB de RAM, 16/64 GB de almacenamento interno, Ethernet, 4 portos USB e 2 portos HDMI (polo que entendemos que podemos empregar a pantalla como se fose un monitor ordinario). Un ordenador para usos básicos, que posiblemente teña un prezo moi semellante ao dun monitor solto (xa que os compoñentes precisos para dotalo das capacidades para correr Android teñen un prezo moi reducido), polo que podería ser un equipo moi atractivo.