Amazon presenta novos produtos da familia Echo

Amazon presentou hoxe toda unha serie de novos dispositivos da familia Echo, facendo que a capacidade de elección do consumidor á hora de querer introducir altofalantes con Alexa no seu fogar sexa cada vez maior. Temos así un novo altofalante Echo (de 3ª xeración), cun deseño actualizado (con acabado de tea) e mellor calidade de son por 99,99 euros; tamén temos un novo Echo dot (de 3ª xeración) á venda por 59,99 euros, e que por 10 euros máis inclúe pantalla LED coa hora, a temperatura exterior, temporizadores e alarmas (polo que aspiraría a ser un accesorio ideal para dormitorios); como solución versátil temos o Echo Flex, que ten un tamaño compacto e integra enchufe de xeito que pode colocarse directamente na toma de corrente na parede, e que custa só 29,99 euros, polo que sería a opción máis cómoda e barata para conectar unha estancia; e, finalmente, o Echo Studio, que busca ofrecer reprodución musical de alta fidelidade, adáptase ao contorno e, en definitiva, sería a alternativa económica (custa 199,99 euros) ao HomePod de Apple, aínda que sobra dicir que esta solución é moito máis versátil (entre outras cousas, porque é compatible con Apple Music, Amazon Music, Spotify e outros servizos musicais).
Amazon tamén anunciou melloras en Alexa bastante importantes, como que xa é quen de murmurar, ou sexa, que a certas horas poderemos falarlle en voz baixa e o asistente responderá do mesmo xeito para molestar o menos posible a persoas que estean durmindo. Outras funcións interesantes é que poderemos preguntarlle a Alexa o que entendeu na última orde, así como tamén será posible activar o borrado automático das gravacións de voz do dispositivo.

A Alexa máis persoal

Os Echo Buds competirán cos AirPods

Curiosamente Amazon só trouxo a España os seus trebellos domésticos, e limitou aos EE.UU. os rechamantes dispositivos persoais con Alexa integrada que presentou hoxe mesmo. Temos así que só os usuarios estadounidense con invitación poderán facerse coas Echo Frames, a lentes con Alexa que venderán a 179,99 dólares; de produción limitada tamén será o Echo Loop, un anel conectado a través do que podemos falar con Alexa e que custará 129,99 dólares; e, finalmente para calquera que estea disposto a pasar por caixa, os Echo Buds, un auriculares sen fíos que pretenden desbancar aos AirPods grazas ao seu prezo de 129,99 euros, a súa tecnoloxía de cancelación de ruído activa achegada por Bose, o seu deseño orientado á práctica deportiva (con boa suxeición e resistencia á suor) e a posibilidade de operar con varios asistentes de voz (ou sexa, que aparte de Alexa tamén é compatible con Siri e o asistente de Google).