Anuncian os Copilot+ PC con procesadores Intel e AMD

En maio Microsoft anunciou un novo concepto de equipo informático, os Copilot+ PC, equipos moi orientados á intelixencia artificial, que no mes de xuño comezaron a facerse realidade con equipos con procesador Qualcomm X Elite, e agora anuncian o seguinte paso no espallamento desta categoría de equipos, con incorporación das familias de procesadores AMD Ryzen AI 300 e Intel Core Ultra 200V.
Deste xeito teremos equipos considerados Copilot+ PC coas distintas familias de procesadores que hai no mercado, e só faltarían por incorporarse os equipos que, con procesadores Intel ou AMD, empregasen as funcións da IA valéndose de gráficas con capacidades de procesamento neural.
Aínda que dende Microsoft apuntan que os equipos considerados como Copilot+ PC teñen numerosas funcións de IA dispoñibles, cómpre salientar que polo momento estamos ante unha promesa, xa que a función estrela (Recordar) está adiada por problemas de seguridade, e incluso as funcións de Copilot básicas aínda non están presentes en equipos con Windows 11 en Europea.
Un dos primeiros fabricantes en presentar un dos novos equipos considerados Copilot+ PC é Samsung, que o seu novo Galaxy Book5 Pro 360 non só ofrece unha grande versatilidade coa súa pantalla táctil, senón que co seu procesador Intel Core Ultra Series 2 promete unha potencia de NPU de 47 TOPS, o que sería dabondo para gozar da IA integrada en Windows. Este equipo chegará a algúns mercados o vindeiro día 24.
Pola súa banda LG tamén move ficha, e anuncia que tamén lanzará un portátil da liña LG Gram con procesador Intel Core Ultra Series 2. Falan concretamente un LG Gram 16 Pro, cun desempeño neuronal de 48 TOPS e un rendemento gráfico de 64 TOPS, que buscaría achegar as bondades da IA a usuarios que precisan dun portátil potente, delgado, lixeiro e con boa autonomía, aínda que haberá que agardar a finais de ano para velo nas tendas.