Apple lanza unha batería externa magnética para iPhone

martes, 13 de xullo do 2021 Marcus Fernández

Entre os accesorios oficiais de Apple destacaban nos últimos anos as fundas para iPhone con batería incorporada que, pese a ser produtos oficiais da compañía da mazá tiñan unha estética moi mala ao dar a impresión de que a súa colocación fai que os móbiles parezan ter chepa, de aí que sexa toda unha sorpresa que recunquen neste concepto deixando a un lado o factor funda e optando unicamente por incorporar unha batería externa aos últimos iPhone aproveitando o conector MagSafe.
A nova batería MagSafe está xa á venda por 109 euros e engade 1.460 mAh aos móbiles da familia iPhone 12. Cando a batería se acopla ao móbil comeza a cargalo a 5 watts, mentres que se conectamos o dispositivo a un cargador de como mínimo 20 watts a batería pasará a alimentar o móbil a 15 watts. Como curiosidade, na web de Apple aseguran que a batería externa pode cargarse conectando a corrente o iPhone, ou sexa, que confirmaría o rumor de que os iPhone 12 contan con carga inversa.
Externamente o móbil non ten indicador de carga, xa que o nivel de carga pode comprobarse directamente no iPhone a través dun widget.
Estamos ante un accesorio que busca incrementar a autonomía do iPhone, non para cargalo rapidamente en mobilidade, polo que pode resultar práctico para quen desexe coidar a batería do seu teléfono con cargas lentas e non lle resulte moi incómodo ou antiestético adherir un bloque de cor branca ao seu terminal.

Así poden verse as novas baterías MagSafe nun iPhone 12 Pro e nun iPhone 12 Pro Max

PUBLICIDADE