Blackmagic estrea unha cámara RAW 6K compacta

venres, 9 de agosto do 2019 Marcus Fernández

O ano pasado Blackmagic Design lanzou unha cámara RAW 4K compacta que actualmente véndese a 1.175 euros, e agora decidiron levar esta proposta un paso máis aló, comercializando unha versión que chega a unha resolución 6K cun prezo de 2.255 euros, o que continúa a ser un prezo moi agresivo para un produto orientado a gravación de vídeo profesional.
A Blackmagic Pocket Cinema 6K é unha cámara cinematográfica de mano, con sensor Super 35 HDR 6K, 13 pasos de rango dinámico, montura EF e un valor ISO nativo dual máximo de 25 600 que ofrece un rendemento excelente en situacións de baixa luminosidade. Está baseada no modelo anterior, pero ao integrar un sensor máis grande consegue unha maior resolución de imaxes, e ao contar con montura EF é compatible cunha ampla gama de obxectivos de distintos fabricantes (Canon, Zeiss, Sigma, Schneider...).
Esta nova cámara grava vídeo até unha resolución de 6.144 x 3.456 píxeles en RAW de 12 bits para que logo poda realizarse a postprodución sen perda de calidade e podendo realizar toda unha ampla gama de axustes. A resolución completa pode gravar até 50 imaxes por segundo, pero en resolución 2,8K pode chegar até 120 imaxes por segundo. As gravacións poden realizarse en tarxetas CFast e SD UHS/II, ou incluso en discos duros externos a través un porto USB-C.
A cámara ten unha pantalla táctil de 5 polgadas que amosa numerosa información durante a filmación, e no que a portos se refire, conta con saída HDMI tipo A (compatible con HDR), entrada mini XLR con alimentación phantom de 48 V, entrada de audio de 3,5 mm, saída de auriculares e conector para corrente continua.
Un produto moi interesante para producións independentes, documentais ou blogs, que consegue resultados de acabado profesional, pero nun formato moi compacto, o que permite reducir enormemente os custos do equipamento a empregar nas rodaxes.

PUBLICIDADE