Canon fai máis accesible a gravación de vídeo estereoscópico inmersivo

Hai tres anos Canon sorprendeu co lanzamento dun obxectivo de ollo de peixe dual para cámaras Canon EOS R5 que facilitaba a gravación de vídeo estereoscópico envolvente, ou sexa, para crear contidos pensando no seu consumo a través de visores de realidade virtual, pero este obxectivo tiña un prezo superior aos dous mil euros, mentres que as cámaras para a que está deseñado tiñan prezos de entre 3.500 e 5.000 euros, facendo que a barreira de entrada para a gravación de contidos envolventes fose algo elevada.
Pero agora que están no mercado as Apple Vision Pro e os visores Meta Quest teñen certa popularidade, tiveron a ben ofrecer unha solución moito máis asumible, co obxectivo Canon RF-S 7.8mm F4 STM Dual Lens, orientado a cámaras APS-C como a Canon EOS R7, de xeito que cun obxectivo que custa uns 579 euros e unha cámara que pode atoparse por 1.489 euros poderiamos conseguir unha solución de gravación de contido audiovisual para visores de VR.
Cómpre salientar que esta solución é moito máis limitada que a primeira proposta de Canon, xa que a cámara empregada grava vídeo en 4K e a separación das lentes do obxectivo dual é moi cativa, polo que os resultados conseguidos estarían limitados en resolución e a elementos filmados a curta distancia (recomendan distancias de entre 0,15 e 0,5 metros).
Do que si presume Canon é das facilidades de software que dá para que coas súas solucións poida crear contido compatible cos visores de Apple e Meta sen grandes complicacións, para o que contan con ferramentas de conversión de vídeo, así como un engadido para o Premiere Pro (o que fai moi doado traballar cos vídeos gravados coas solucións desta marca).
Dado que o novo obxectivo só pesa 130 gramos, e a cámara ten un peso de 530 gramos, estamos ante unha solución moi lixeira e compacta, que pode transportarse comodamente, polo que abre as portas a moitos tipos de gravacións inmersivas que non se realizarían de ter que contar cunha cámara voluminosa como a que propón Blackmagic Design.