Chega a España o Nokia Lumia 520 a un prezo libre de 179 euros
luns, 8 de abril do 2013
- O Lumia 520 pode mercarse en cinco cores distintas
O móbil con Windows Phone 8 máis accesible en prezo do
mercado chega finalmente a España, podendo xa encargarse o Nokia Lumia 520,
comercializado con
contrato a través de Vodafone (compañía coa que sae de balde para as
tarifas RED Pro e Base Pro con contas mensuais que parten dos 15 euros) e no
mercado libre a través
das tendas de The Phone House e incluso en
Amazon.es (onde agardan ter unidades deste móbil o vindeiro venres) a un
prezo de venda recomendado de 179 euros (IVE incluído), o que considérase un
prezo moi axustado, pois estamos ante un móbil que achega unha experiencia de
uso superior aos móbiles con Android que están en tal rango de prezo.
O Nokia Lumia 520 está dispoñible en amarelo, vermello, azul ceo, branco e
negro, con carcasas intercambiables e coa meirande parte das prestacións que
dan sona á familia Lumia, como unha pantalla táctil supersensitiva (capaz de
funcionar coas luvas postas) e o software exclusivo de Nokia para móbiles con
Windows Phone 8.
Este novo móbil funciona cun procesador Snapdragon S4 de dobre núcleo a 1 GHz,
512 Mb de RAM, 8 Gb de almacenamento interno ampliable mediante tarxetas de memoria
de ata 64 Gb, cámara de 5 Mpíxeles con gravación de vídeo a 720p, USB 2.0,
Bluetooth 3.0 e batería de 1.430 mAh. Entre as súas posibilidades están o poder
empregar lentes dixitais nas súas fotografías (con funcionalidades de disparo
intelixente, fotografías panorámicas e moitas outras), acceso ao servizo
musical Nokia Mix Radio, mapas e navegación GPS de balde (coa posibilidade de
funcionar sen acceso á Rede) e, en definitiva, gozar do sistema operativo móbil
de Microsoft e da súa boa integración con numerosos servizos ao redor de
Windows e a Xbox 360, así como das plataformas sociais máis populares.
