Chegan ao mercado español novos Chromebook

Hai 10 anos Google quixo popularizar un concepto de ordenador portátil orientado á Internet, os Chromebook, que nos EE.UU. conseguiron trunfar no sector educativo pero que en España apenas tiveron presenza comercial, resultando practicamente imposible atopalos en tendas físicas e sendo uns auténticos descoñecidos para os docentes. Pero esta situación podería mudar radicalmente nos vindeiros meses, xa que dende hoxe mesmo os Chromebook melloran a súa presenza comercial en España, de xeito que poderemos ver equipos desta categoría de fabricantes como Acer, Asus, HP e Lenovo a través de tendas como Amazon, El Corte Inglés, MadiaMarkt e PC Componentes, ou incluso o novo espazo web que recolle os produtos desta familia que poden mercarse en España.
Os Chromebook son equipos que resultan moi prácticos, xa que están orientados a un uso práctico baseado na tecnoloxía web de Google, o que inicialmente pode parecer moi limitado, pero que cada vez é un escenario máis completo, e que xoga con grandes vantaxes como un elevado nivel de seguridade (o sistema operativo é moi seguro, e cun grande nivel de control dos seus usuarios), facilidades á hora de administrar os usuarios que os usan (algo moi práctico no caso de que os usuarios sexan rapaces, xa que proxenitores ou docentes poderán establecer certos límites de uso) e incluso conta cunha autonomía da impresión (provocada principalmente pouca esixencia de potencia que ten Chrome OS).
Entre os equipos que chegan a España destacan o Lenovo Chromebook S45-14 , que parte dun prezo de 349 euros, e que en breve terá como grande competidor o Acer Chromebook 311, cun prezo de 299 euros e un deseño resistente (pensando principalmente no seu uso por cativos). Tamén incorporouse ao catálogo de equipos o Lenovo Chromebook C340-11, que terá un prezo de 399 euros.
Cómpre lembrar que os últimos Chromebook xa non se limitan a correr aplicacións web, senón que tamén son compatibles con aplicacións para Android e moitos modelos incluso contan con pantalla táctil, de xeito que son equipos moi versátiles, que sen chegar a ser un ordenador tradicional, poden suplir moitas das súas funcións e incluso resultar moito máis eficientes en certos escenarios.