Comeza a produción dos ordenadores de escritorio con IA de nVIDIA

nVIDIA anunciou hoxe que os principais fabricantes de sistemas de Taiwán comezarán a producir os novos superordenadores persoais de IA DGX Spark e DGX Station presentados en marzo, consolidando así alianzas estratéxicas con empresas como Acer, Gigabyte e MSI e ampliando a presenza global destes dispositivos, deseñados para ofrecer un rendemento e eficiencia sen precedentes a desenvolvedores, científicos de datos e investigadores de todo o mundo.

DGX Spark: innovación en formato compacto

O modelo DGX Spark está equipado co superchip nVIDIA GB10 Grace Blackwell e núcleos Tensor de quinta xeración. Ofrece ata 1 petaflop de capacidade de computación en IA e 128 GB de memoria unificada, coa posibilidade de exportar modelos facilmente á nube nVIDIA DGX Cloud ou a calquera infraestrutura de centro de datos acelerado.
Este sistema permite impulsar o desenvolvemento de solucións de IA xerativa e outras cargas de traballo complexas en múltiples sectores, mantendo un equilibrio ideal entre rendemento e tamaño.
O DGX Spark estará dispoñible a partir de xullo a través de fabricantes como Acer, ASUS, Dell, Gigabyte, HP, Lenovo e MSI, así como mediante distribuidores autorizados. As reservas estarán dispoñibles vía web.

DGX Station: superpotencia para a IA local

Deseñado para tarefas de IA especialmente esixentes, a DGX Station integra o superchip nVIDIA GB300 Grace Blackwell Ultra Desktop, que alcanza ata 20 petaflops de rendemento e conta con 784 GB de memoria unificada. Inclúe tamén a tarxeta de rede nVIDIA ConnectX-8 SuperNIC, con velocidades de ata 800 Gbps, o que garante conexións ultrarrápidas e permite traballo colaborativo entre equipos.
O sistema pode empregarse como estación de traballo individual ou como nodo compartido entre varios usuarios. Ademais, permite dividir os seus recursos en ata sete instancias independentes grazas á tecnoloxía nVIDIA Multi-Instance GPU, funcionando como unha nube persoal para grupos de investigación e desenvolvemento.
A DGX Station chegará ao mercado máis adiante este ano da man de ASUS, Dell, GIGABYTE, HP e MSI.

Unha experiencia igual á dos centros de datos industriais

Tanto DGX Spark como DGX Station comparten a arquitectura de software dos grandes centros de computación, con sistema operativo nVIDIA DGX, preconfigurado co último ecosistema de software de IA da compañía. Inclúe acceso aos microservizos nVIDIA NIM e ás guías técnicas nVIDIA Blueprints.
Ambos sistemas son compatibles con ferramentas coñecidas como PyTorch, Jupyter ou Ollama, o que facilita a creación, axuste fino e despregamento de modelos tanto no escritorio como na nube.

Dell e HP, entre os primeiros en adoptar os novos equipos

Dell Technologies será unha das primeiras compañías en integrar os sistemas DGX Spark e DGX Station. Segundo Michael Dell, «hai unha tendencia clara a buscar solucións capaces de asumir as novas cargas intelixentes. O interese nestes equipos marca o inicio dunha nova era na computación de escritorio».
Tamén HP Inc. incorporará estas solucións ao seu catálogo cun novo modelo, o HP ZGX. O seu CEO, Enrique Lores, salientou que a colaboración con nVIDIA permitirá «achegar o rendemento dos centros de datos aos postos de traballo, acelerando a innovación e abrindo novas oportunidades».