FICOD 2011 abre mañá as súas portas

Mañá martes ás 9 da mañá, abrirá as súas portas a V edición do Foro Internacional de Contidos Dixitais (FICOD), un evento agardado por milleiros de persoas provenientes dun amplo abano de sectores do máis variado, que teñen como nexo de unión o dixital e a tecnoloxía postas ao servizo da innovación.
Audiovisual, ocio dixital interactivo, música, prensa, publicidade, propiedade intelectual, deseño... en FICOD hai cabida para todo e para todos, en especial para aquelas persoas interesadas en coñecer as novas tendencias e os retos aos que se enfronta o sector tecnolóxico na actualidade.
O evento, que se celebra ata o día 24 de novembro, conta con Telefónica como patrocinador principal e México como país convidado, e consolídase como punto de encontro de referencia a nivel nacional e internacional.
Nesta primeira xornada o convidado estelar será Tim O´Reilly, fundador e CEO de O´Reilly Media, considerada a mellor editorial de informática do mundo, e creador do concepto web 2.0, que ofrecerá o seu relatorio, Economías e ecosistemas de contidos, a partir das 10:00.
A maiores, na xornada inaugural contarase coa presenza de Juan Junquera, secretario de Estado de Telecomunicacións e para a Sociedade da Información, e Héctor Olavarría, subsecretario de Comunicacións de México.
Thom Brenner (Nokia) e Olof Schybergson (Fjord) son outros dos convidados do día 22, os cales explorarán a “explosión dos contidos dixitais de localizacion” e o “extraordinario potencial futuro do mapping e as solucións de navegación”.
A primeira xornada complétase coa entrega dos Premios FICOD e os Premios INVI 2011, que terán lugar a partir das 20:00 horas e nos que se recoñecerán os proxectos máis innovadores e orixinais.
Un total de 28 talleres, 8 debates, 3 mesas redondas e 6 seminarios completan as actividades que se levarán a cabo nesta edición de FICOD a celebrar de aquí ao 24.