Filtran detalles das futuras Apple Glass

O hermetismo de Apple conseguiu que os seus lanzamentos fosen confidenciais até poucas horas antes da súa presentación oficial ou incluso chegaron a ser auténticas sorpresas no caso de produtos que non comezaran a súa produción fóra de EE.UU., pero nos últimos meses xurdiron numerosos detalles sobre futuros dispositivos de Apple, filtrados en moitos casos por unha única persoa, Jon Prosser, que de confirmarse estragaría a sorpresa a moitos.
Segundo Prosser, que parece ter fontes bastante solventes dentro de Apple, un dos produtos máis rumoreados dos últimos anos, a lentes de realidade aumentada de Apple, estarían bastante preto de converterse nunha realidade, aínda que a presentación deste accesorio do iPhone dependería moito de como evolucione a actual crise sanitaria, xa que a intención sería amosar as Apple Glasses a xeito de sorpresa final nunha presentación de Apple a finais do presente ano ou a comezos do que vén.
As Apple Glass serían unas lentes bastante tradicionais, que poderían equiparse con cristais graduados (aínda que non de sol) e que funcionarían en combinación cun iPhone (dispositivo que procesaría o sinal recollido por un sensor LiDAR e que enviaría o vídeo que se proxectaría fronte aos ollos). Coméntase que Apple optaría por un sensor LiDAR en vez dunha cámara tradicional para evitar o rexeitamento que provocaron no seu día as Google Glass.
Este novo dispositivo controlaríase mediante xestos, e como detalle máis rechamante estaría o feito de que proxectan que o produto estea dispoñible para o público a finais de 2021 ou comezos de 2022 a un prezo de 499 dólares, o que sería moito menos que outros produtos comerciais semellantes, o que aumenta o interese cara a este produto wearable que podería provocar o pulo que a realidade aumentada precisa.
Segundo Prosser o anuncio das Glass tería lugar xunto ao dos novos iPhone 12, do que tamén adianta que haberá 4 modelos, de xeito que a finais de ano habería un iPhone 12 con pantalla de 5,4 polgadas, un iPhone 12 Max con pantalla de 6,1 polgadas, un iPhone 12 Pro con pantalla de 6,1 polgadas e un iPhone 12 Pro Max con pantalla de 6,7 polgadas, que incluirían todos conectividade 5G e uns prezos moi na liña dos iPhone actuais.