Fíltranse imaxes do Huawei Ascend W1

A festa do Windows Phone non vai quedar só para Nokia, HTC e Samsung, senón que outros fabricantes que podiamos considerar menores tamén van apuntarse, e así temos agora imaxes do futuro Huawei Ascend W1, que veñen de ser filtradas á Rede, e que parecen corresponder a un terminal con Windows Phone 8, con pantalla de 4 polgadas cunha resolución de 800 x 480 píxeles, procesador de dobre núcleo a 1,2 GHz e procesador gráfico a 400 MHz, 512 Mb de RAM, 4 Gb de almacenamento interno, cámaras de 5 e 0,3 Mpíxeles e batería de 2.000 mAh.
Ao parecer, o móbil de Huawei venderase nunha gama de cores que lembraría aos Nokia Lumia, e como principal sorpresa teriamos que o conector de carga microUSB non estaría centrado na parte inferior do móbil (senón que estaría na parte inferior dereita).
Dá a impresión de que antes do Nadal e a primeiros de 2013 imos ver moitos móbiles con Windows Phone, que quererán aproveitar o pulo que Microsoft quere dar a tal plataforma que aproveitará a saída de Windows 8, Surface e a actualización do Dashboard de Xbox 360.