GeeksPhone prepara o seu segundo móbil con Android

Que unha empresa española ousase desenvolver un móbil co sistema operativo Android con éxito, o GeeksPhone One, parecía unha tolería, pero os seus responsables parecen saber o que se fan, pois nos vindeiros días van comezar a vender o seu sucesor, o GeeksPhone Zero, que actualiza moitas das súas prestacións manténdose coma terminal de gama media que poderá reservarse por 189 euros (cun desconto de 10 euros o primeiro mes ou de 20 euros de presentarse o IMEI do modelo anterior).
O novo móbil con Android 2.3 sorprende por incluír unha versión desta ROM elaborada por Cyanogen (responsable das ROM de Android alternativas de máis sona), mentres que o seu hardware parece bastante contido, xa que conta cunha pantalla capacitiva de 3,2 polgadas cunha resolución de 480 x 320 píxeles, procesador Qualcomm MSM7227-2 a 600 MHz, 256 Mb de RAM, 512 Mb de ROM, cámara de 5 Mpíxeles con enfoque automático, aGPS, compás dixital, acelerómetro, radio FM, lector de tarxetas de memoria microSD, batería de 1.150 mAh, unhas dimensións de 105 x 58 x 13 milímetros e un peso de 119 gramos.
Dende GeeksPhone tamén poderían estar a desenvolver o GeeksPhone Two, un móbil que contaría cunha pantalla de 4 polgadas e unhas prestacións propias dos terminais máis populares do mercado (mentres que actualmente limítanse a competir con dispositivos coma o HTC Wildfire, na gama máis económica deste tipo de terminais). Tamén poderían sorprendernos con algún tablet no futuro.