Gradiant e a Xunta anuncian máis traballo conxunto a prol da transformación das empresas galegas
martes, 25 de xaneiro do 2022
A
Xunta e o Centro Tecnolóxico Gradiant reforzarán a súa
colaboración a prol dun sector empresarial galego que afronta, máis
ca nunca, o reto da transformación tecnolóxica. Así
o deron a coñecer o director xeral de Gradiant, Luis Pérez Freire,
e máis o conselleiro de Economía, Francisco Conde, na reunión
do Consello Consultivo do centro tecnolóxico e máis na inauguración
das novas instalacións de Gradiant en Vigo, ambos eventos celebrados
este martes 25 de xaneiro. Segundo confirmaron, as instalacións
presentadas hoxe funcionarán como centro de ensaios e probas da
tecnoloxía 5G en Galicia.
O
vicepresidente económico felicitou ao centro tecnolóxico polo seu
labor, sinalando que “2021 foi un ano de récord, con seis millóns
de euros en proxectos de I+D+i concibidos e desenvolvidos en Galicia;
un crecemento do 15% en facturación; un incremento do 50,2% na venda
de patentes e licenzas; e un 71% máis de proxectos directamente
encargados por empresas”.
Desde
os seus inicios, foron xa máis de 200 empresas galegas,
especialmente pemes e no ámbito das TIC, as que se beneficiaron dos
servizos de Gradiant, con máis de 340 proxectos que desenvolveu
xunto con empresas e organismos de 30 países.
“Só
o ano pasado, Gradiant achegou os seus desenvolvementos a 70
compañías”, lembrou o conselleiro, facendo balance da actividade
xerada polo centro tecnolóxico.
Conde
fixo fincapé no apoio da Xunta de Galicia para seguir na mesma liña,
apostando “pola especialización” e “tratando de incrementar o
impacto das investigacións e desenvolvementos tecnolóxicos no
tecido produtivo”.
O
responsábel de Economía agradeceu a Gradiant a súa implicación e
participación en proxectos clave na Galicia do 2030, como a
elaboración da nova Estratexia de Especialización Intelixente
(RIS3), a folla de ruta para unha innovación transversal e
sustentábel na nosa terra; nos hubs de innovación dixital, que a
Xunta busca converter en xanelas de acceso a tecnoloxías punteiras
necesarias para a transformación dixital das pemes; e no Polo
Aeroespacial de Galicia, xunto a grandes empresas do sector para
permitir o desenvolvemento dos vehículos aéreos non tripulados.