HTC fabricará móbiles cun botón dedicado a Facebook

martes, 15 de febreiro do 2011 Marcus Fernández

O HTC Salsa é un terminal con Android 2.3.3 e un botón contextual para facilitar o acceso a Facebook

HTC presentou hoxe no Mobile World Congress un par de teléfonos móbiles que combinan a simplicidade e facilidade de uso da interface HTC Sense co potencial e a conectividade de Facebook, o que queda evidente na presenza dun botón dedicado precisamente á plataforma social creada por Mark Zuckerberg, de xeito que cun toque pode accederse ás súas funcións chave.
Os móbiles en concreto son os HTC ChaCha e HTC Salsa, que funcionan con Android 2.3.3 e a última iteración de HTC Sense para a súa integración con Facebook, de xeito que, por exemplo, ao realizar ou recibir unha chamada telefónica, podemos ver a última actualización de estado e as últimas fotografías do amigo co que queremos falar e incluso poderemos saber se está próxima a celebración do seu aniversario. Estes terminais tamén contan con distintos widgets de Facebook para personalizar os seus escritorios.

O HTC ChaCha incorpora un teclado QWERTY e o novo botón para acceder a Facebook

O HTC Salsa é un terminal con pantalla táctil de 3,4 polgadas cunha resolución de 320 x 480 píxeles, procesador a 600 MHz, 512 Mb de RAM, 512 Mb de almacenamento ampliable mediante tarxetas microSD, cámara traseira de 5 Mpíxeles con enfoque automático e flash LED e cámara frontal VGA para videoxhamadas, Wi-Fi, GPS, Bluetooth, compás dixital, xiroscopio, conector microUSB, toma para auriculares, batería de 1.520 mAh, unhas dimensións de 109,1 x 59,9 x 12,3 milímetros e un peso de 120 gramos.
O HTC ChaCha muda de formato, e preséntase coma un terminal de tipo barra con teclado QWERTY (la liña dos móbiles de BlackBerry), conta cunha pantalla táctil de 2,6 polgadas cunha resolución de 480 x 320 píxeles e coincide en prestación co seu irmán o HTC Salsa, agás pola súa batería (de só 1.250 mAh) e as súas dimensións (114,4 x 64,6 x 10,7 milímetros).
Estes novos móbiles estarán dispoñibles en Europa a partir do segundo trimestre do ano, prometendo un prezo moi competitivo.

PUBLICIDADE