LG presenta a terceira xeración dos seus smartphones da familia L

LG anunciou nas últimas horas que levará ao Mobile World Congress de Barcelona a súa gama de móbiles L, que chega á súa Serie III, de xeito que a compañía surcoreana segue a coidar a súa gama de terminais para o grande público, non dedicando só os seus esforzos aos seu recoñecidos móbiles da serie G (de alta gama).
As dúas primeiras xeracións dos móbiles LG L tiveron un importante volume de vendas a nivel mundial, e agora melloran o seu deseño, refinan o seu marco metálico e permiten facer uso de fundas con Quick Window (que protexen integramente o móbil, deixando un pequeno espazo na cara correspondente á pantalla para permitir ver información como a hora ou a identidade de quen non chama sen ter que abrir a cuberta protectora), prestación vista en varios terminais de gama alta que agora chega a esta gama media.
Todos os smartphones da Serie III de LG chegarán con Android 4.4, coa interface gráfica de LG (UX) e os dispositivos continúan a escalar segundo o seu número de modelo, partindo dun L40 (cun procesador de dobre núcleo a 1,2 GHz, pantalla de 3,5 polgadas cunha resolución de 480 x 320 píxeles, 512 Mb de RAM, 4 Gb de almacenamento interno, cámara de 3 Mpíxeles e batería de ata 1.700 mAh) e chegando ata o L90 (cun procesador de catro núcleos a 1,2 GHz, pantalla de 4,7 polgadas cunha resolución de 960 x 540 píxeles, 1 Gb de RAM, 8 Gb de almacenamento interno, cámaras de 8 e 1,3 Mpíxeles e batería de 2.540 mAh), pasando polo L70 (cun procesador de dobre núcleo a 1,2 GHz, pantalla de 4,5 polgadas cunha resolución de 800 x 400 píxeles, 1 Gb de RAM, 4 Gb de almacenamento interno, cámara de 8/5 e 0,3 Mpíxeles e batería de 2.100 mAh).

Vídeo sobre o deseño dos LG L Series III no que podemos ver o deseño das súas fundas con Quick Window