LG presenta un par de monitores para os últimos produtos de Apple

LG presenta hoxe un par de monitores de alta calidade deseñados especificamente para os últimos produtos de Apple, sendo compatibles con Mac e incluso con iPad Pro, o que agradecerán profesionais que precisen de pantallas de alta densidade no escritorio.
Por unha banda temos o monitor UltraFine 5K de 27 polgadas (modelo 27MD5KL), á venda por 1.399 euros; e por outra temos o monitor UltraFine 4K de 24 polgadas (modelo 24MD4KL), á venda por 749 euros. Estas pantallas da serie UltraFine ofrecen unha grande calidade de imaxe e soportan Thunderbolt 3 e USB-C, de aí que poidan empregarse en combinación cos últimos MacBook e iPad Pro, o que resulta especialmente interesante no caso do monitor UltraFine 5K, que ten 94 watts de potencia é capaz de cargar tamén portátiles e tabletas por USB-C.
O monitor UltraFine 5K ten unha gama cromática ampla (P3), un brillo de 500 nits e presenta unha resolución de 218 píxeles por polgada. A súa resolución total de 5.120 x 2.880 píxeles permite amosar contidos con grande nivel de detalle, así como amosar diferentes fiestras e ferramentas de xeito simultáneo sen perder detalle. Tamén integra altofalantes estéreo, cámara e micrófono, o que abre numerosas posibilidades.
Dado que estamos ante un monitor destinado a un público profesional, non lle faltan detalles como permitir a súa regulación en altura e inclinación e incluso é compatible con Touch Bar e o teclado do MacBook Pro para poder controlar o seu volume e brillo dun xeito áxil.
O monitor UltraFine 4K ten unha pantalla de 23,7 polgadas, e tamén presenta unha gama cromática ampla (P3) e un brillo de 500 nits, pero o seu tamaño máis reducido fai que a súa resolución quede en 3.840 x 2.160 píxeles. Integra altofalantes estéreo, permite axustar o seu brillo e volume a través de macOS (prescindindo así do uso de botóns físicos) e tamén pode cargar dispositivos por USB-C, aínda que desta volta a súa potencia queda en 85 watts.