Leap 3D podería facilitar o control do ordenador mediante xestos sen contacto

luns, 21 de maio do 2012 Marcus Fernández

A startup de San Francisco chamada Leap Motion vén de dar a coñecer un novo sistema de control por movemento chamado Leap 3D que achegaría unha experiencia de uso semellante á que ofrece o Kinect da Xbox 360, pero cun nivel de precisión moi superior, orientándose non á detección do corpo completo, senón dos propios dedos das mans, para poder controlar o noso equipo informático mediante xestos, o que permitiría tamén trasladar parte da mecánica de uso de dispositivos como tablets e smartphones, coa vantaxe de que funcionaría grazas a un pequeno dispositivo USB que pretende venderse por só 70 dólares, aínda que haberá que agardar ata o ano que vén para que este produto chegue ao mercado de consumo.

JPEG - 71.8 KB
Leap 3D podería permitir o uso de xestos para facer zoom nun mapa coma nun smartphone ou nun tablet

Así como Kinect conseguiu trunfar con xogos deportivos e de baile, o feito de que, segundo Leap Motion, este novo sistema teña unha precisión 200 veces maior, sería posible crear un espazo tridimensional de interacción fronte a pantalla do ordenador, de xeito que podería empregarse Leap para navegar polos sistema operativo e páxinas web empregando os dedos, facer zoom en mapas separando os dedos, interactuar con modelos de barro en 3D, realizar debuxos en 2D/3D con precisión, manipular complexas visualizacións de datos en 3D, xogar ou asinar documentos escribindo no aire, ou sexa, que achegaría unha experiencia comparable ao que no seu día puidemos ver na película Minority Report, e que tamén foi o que prometeu Kinect no seu día, polo que haberá que ser prudente á hora de valorar esta tecnoloxía.
Polo momento, Leap Motion xa conseguiu 12,75 millóns de dólares de capital achegado por Andy Miller (Highland Capital Partners) a primeiros de mes, o que poderá servir para ir fornecendo esta plataforma que de funcionar como prometen, podería atraer a numerosos desenvolvedores para adaptar as súas aplicacións a esta interface de uso.


Vídeo de presentación da nova tecnoloxía de control desenvolvida por Leap Motion

PUBLICIDADE