Logi presenta unha cámara para o fogar que rexistra o máis interesante de cada día

Para os que queiran estar tranquilos cando están fóra do fogar contemplando a distancia o que acontece no seu interior chega a nova Logi Circle, unha curiosa cámara doméstica de vixilancia que transmite vídeo en directo en alta definición que podemos ver en directo dende o móbil (conta con aplicación de balde para Android e para iOS) e tamén presenta un curioso informe diario de 30 segundos cos momentos máis significativos do día (para o que emprega unha tecnoloxía de “intuición de escena” aprendendo os patróns da nosa actividade doméstica para detectar só a actividade interesante).
Outra función interesante da Logi Circle é que conta con son bidireccional, ou sexa, que cando esteamos a distancia podemos empregar a cámara como sistema de comunicación, incluso movendo a cámara por todo o fogar (xa que integra unha batería cunha autonomía de até 3 horas de uso continuo).
A Logi Circle conta con conectividade Bluetooth e Wi-Fi N de dobre banda, ten un ángulo de visión de 135 graos, pode enviar notificacións ao móbil cando algo aconteza no fogar, inclúe unha base magnética que facilita a súa colocación na parece e ten un prezo nos EE.UU. de 199,99 dólares.