Novos reprodutores portátiles de Sony con Android 4.0

mércores, 18 de xullo do 2012 Marcus Fernández

O F800 conta cunha pantalla de 3,5 polgadas e Android 4.0

Sony anunciou hoxe unha nova liña de reprodutores multimedia portátiles da familia Walkman, na que figura o F800, que destaca por incorporar Android 4.0 e ofrecer unha excelente calidade sonora grazas a un amplificador dixital S-Master integrado que reduce os niveis de ruído e distorsión conseguindo unha experiencia musical enriquecida. O Walkman F800 conta cunha serie de aplicacións preinstaladas (correo, mapas, reprodución multimedia, xogos...), conta cunha pantalla multi-táctil de 3,5 polgadas e funciona cun procesador de dobre núcleo nVIDIA Tegra 2. O seu prezo será de 269,99 dólares para o seu modelo de 16 Gbytes, mentres que cun almacenamento interno de 32 Gb custará 299,99 dólares.

O Walkman E470 presume dun grosor de só 7 milímetros

Entre os novos Walkman tamén está o E470, que presume de ser o modelo máis delgado na historia da familia Walkman (só 7 milímetros de grosor) e a súa pantalla ten unha diagonal de 2 polgadas. Estará dispoñible en capacidades de 8 e 16 Gbytes por 89,99 e 109,99 dólares respectivamente.
Estes novos Walkman, que chegarán ás tendas a primeiros de agosto, poderán acceder aos 15 millóns de cancións dispoñibles no Music Unlimited Service, servizo musical baseado na nube de Sony Entertainment Network. Por unha cantidade mensual o servizo permite copiar ao dispositivo as nosas cancións favoritas e escitar canles de radio sen publicidade (para descubrir música incluso cando esteamos fóra de liña). Para facilitar que os usuarios poidan acceder de xeito doado aos seus contidos multimedia actuais, os dispositivos Walkman permiten copialos dende iTunes (en Windows) facendo uso do software Media Go.

PUBLICIDADE