O Alpha 400 podería ser o ultraportátil máis barato do mundo

Dende Hong Kong chega un novo ultraportátil de baixo custo que promete ser o máis barato do mercado, xa que se vendería só por 250 dólares a usuarios finais ou a 180 dólares en pedidos de 100 equipos (resultando incluso máis barato que o XO-1 do proxecto OLPC, que actualmente custa 188 dólares).
O Alpha 400 está baseado nun procesador XBurst de 32 bits a 400 MHz (con arquitectura RISC), 128 Mb de RAM, entre 1 e 2 Gb de memoria SSD, 2 portos USB, lector de tarxetas SD (de ata 32 Gb), unha pantalla de 7 polgadas a 800 x 480 píxeles e posibilidade de expansión a través dos seus portos USB, de xeito que se lle poderá engadir Wi-Fi, Ethernet, banda larga móbil ou ADSL con distintos accesorios.
O equipo mide 21,2 x 14,2 x 3,3 centímetros e pesa 700 gramos, resultando un produto lixeiro e moi portátil que é capaz de navegar pola Internet, procesar documentos ofimáticos e funcionar coma reprodutor multimedia (pois incorpora un paquete de aplicacións de Xiptech).