O BNG insta ao Goberno a solucionar o problema da equiparación dos títulos de Enxeñaría Informática anteriores a Bolonia
luns, 28 de abril do 2014
O Colexio Profesional de Enxeñaría en Informática
de Galicia, CPEIG, vén de informar que as reclamacións do colectivo
que representa (e dos enxeñeiros en Informática Técnica,
representados na nosa terra polo CPETIG) en relación á
necesidade de equiparar os títulos de enxeñaría anteriores a
Bolonia, están a
ter eco importante entre os grupos parlamentarios. Máis polo
miúdo, a plataforma profesional que preside Fernando Suárez,
recibiu unha comunicación do Grupo Parlamentario Mixo no Congreso de
Deputados a raíz dunha pregunta feita por unha deputada do BNG sobre
a devandita equiparación dos títulos.
Segundo o CPEIG, a “cuestión recolle a
preocupación manifestada polo CPEIG aos partidos do arco
parlamentario en diversas xuntanzas de traballo”.
Máis polo miúdo, a deputada do Bloque Nacionalista
Galego (BNG), Rosana Pérez Fernández, expuxo (entre outras) as
seguintes cuestións na súa pregunta por escrito dirixida ao Goberno
central:
- Por que razón non resolveu aínda o Ministerio de
Educación o problema da falla de equiparación dos títulos
universitarios de enxeñaría dos plans de estudo anteriores ao Plan
Bolonia co nivel de máster actual?
- A que se debe este adiamento que está
prexudicando a moitos enxeñeiros e enxeñeiras con anos de
experiencia que se ven obrigados a emigrar a países estranxeiros
para poder traballar?
- Vai o goberno solucionar ese baleiro legal canto
antes?
Segundo informa o CPEIG, o Goberno (a través do
Ministerio de Educación, Cultura e Deporte) amósase en resposta
“consciente do problema” no que se atopan os universitarios
españois que obtiveron un título anterior á posta en marcha do
Espazo Europeo de Educación Superior (EES) e afirma “estar
traballando na busca dunha solución, que debe afectar non só aos
colectivos de enxeñeiros, senón a todas as titulacións anteriores
á posta en marcha do EES”.