O CERN emprega software desenvolvido no CESGA
martes, 27 de abril do 2010
Se de algo podemos
estar orgullosos os galegos e galegas que presumimos da calidade da nosa terra
alén das nosas fronteiras é da nosa lingua, da nosa gastronomía, das nosas
praias (que xa comezan a recibir os primeiros bañistas) e como non, do CESGA, o Centro de Supercomputación de Galicia,
que ademais de todo o que leva feito en materia de cálculo e almacenamento
masivo de datos, levando o selo galego por todo o mundo, agora pode xactarse
tamén de desenvolver software que se emprega, nin máis nin menos que no CERN.
Dende o propio
CESGA explican que o WLCG (Worldwide LHC Computing Grid), a infraestrutura grid
creada para distribuír, almacenar e analizar os datos que se extraerán dos
experimentos do Large Hadron Collider do CERN, está a empregar software
desenvolvido polo Centro de Supercomputación de Galicia para EGEE, (Enabling
Grids for e-Science) e EELA (e-science grid facility for Europe and Latin
America). En concreto, o Portal de
Contabilidade (Accounting) e o Portal
de Métricas desenvolvidos para EGEE, e o software que permite utilizar o
sistema de colas GridEngine.
O proxecto WLCG
depende de varios outros proxectos para a subministración de gran parte do
software especializado que se utiliza para xestionar a distribución de datos e
acceso, así como o envío de traballos e a autenticación e autorización de
usuarios; este software é coñecido colectivamente como o middleware Grid. No
caso de WLCG, o middleware utilizado denomínase gLite (Lightweight Middleware
for Grid Computing). Este middleware é desenvolvido dentro do proxecto europeo EGEE, e é empregado,
ademais, en WLCG e EELA.
O CESGA, como
membro de EGEE e EELA, desenvolveu o Portal
de Contabilidade que permite analizar o uso que se fai dos computadores
mediante a xeración de estatísticas de consumo de recursos. O CESGA encargarase
de manter o Portal de Contabilidade da futura infraestrutura grid europea, que
continuará o traballo iniciado en EGEE ahora baixo o nome de EGI (European Grid
Iniciative). Ademais adaptarao ás necesidades deste novo ecosistema no que
xogan un papel primordial as NGI (National Grid Iniciatives), os SSC (Specialised
Support Centres).
Portal de
Métricas
O CESGA
desenvolveu tamén o Portal de Métricas para
EGEE, que recolle de forma automática información de distintas fontes e xera as
correspondentes métricas. O novo portal, que se está a desenvolver, permite
medir de forma obxectiva o progreso dun proxecto. Pode seguir a súa evolución
de forma sinxela sobre a base de datos actualizados e posibilita a xeración de
informes en segundos.
Adicionalmente, o
CESGA, en colaboración co LIP de Portugal e o Imperial College de U.K.,
integrou en gLite, actualmente o
middleware grid máis estendido, GridEngine,
o sistema de colas utilizado nos superordenadores do CESGA. GridEngine conta
con avanzadas funcionalidades que poden ser de grande utilidade aos centros que
participan no grid, e que agora teñen a opción de elixir este sistema de colas,
adicionalmente á solución torque/maui.
Recursos de
Computación a disposición do LHC
O CESGA pon a
disposición do WLCG, EGEE e EELA os seus recursos grid, e subministra o
aloxamento e colabora no mantemento do Tier2 do Laboratorio de Física de Altas
Enerxías da Universidade de Santiago, USC, que se encarga de recibir e analizar
os datos do experimento LHCb do CERN.
O CESGA contribúe ademais nos catro
experimentos principais (ATLAS, CMS, ALICE e LCHb) que se están a realizar no
LHC do CERN, cos seguintes recursos informáticos:
ALMACENAMENTO:
143 Terabytes de almacenamento para os traballos.
CÁLCULO: 404
CPUs para cálculo no SVG (Superordenador Virtual Galego) para a execución de
traballos con estas características:
80 servidores
DELL 750 con procesador Pentium4 a 3.2GHz. 48 servidores dispoñen dunha memoria
principal de 1GB e 32 servidores dispoñen de 2GB. Os servidores dispoñen dun
disco de 160GB SATA a 7200rpm. Todos estes nodos están interconectados mediante
Gigabit Ethernet a un servidor de datos 1750 con 2 procesadores Xeon a 3GHz e
438GB de disco SCSI en configuración RAID 5.
40 servidores blade: 36 DELL PE 1955 con dobre procesador quad-core Intel Xeon 5310 a 1.6GHz con 4GB de
memoria principal e un disco de 72GB SAS a 10.000rpm e 4 servidores blade DELL
PE 1955 con dobre procesador quad-core Intel Xeon 5355 a 2.66 GHz con 8GB de
memoria principal e dous discos de 72GB SAS a 10,000rpm. Todos estes nodos
están interconectados mediante Gigabit Ethernet a un servidor de datos 2950 con
2 procesadores Xeon 5130 a
2GHz e 4GB de memoria e 1800GB de disco SCSI en configuración RAID 5.
2 servidores DELL 1425 con procesador Pentium Xeon64 a 3.2GHz e 3GHz, un con 80GB e outro
con 500 GB de disco local SATA.
O tráfico de
datos que se estivo a recibir no último ano, está a aumentar notablemente a
raíz de que, o de pasado día 30 de marzo se conseguiu no túnel do LHC a maior
colisión de protóns en laboratorio da historia, cunha enerxía de 7TeV
(TeraelectrónVoltios), dando inicio ao programa de investigación dos
experimentos do CERN.