O CNTG acolle estes días a segunda parte do curso Redes Sociais e Comunicación 2.0
mércores, 12 de xuño do 2013
O
perfil que cadaquén amosa nas redes sociais pode ser unha arma de
dobre fío á hora de procurar un emprego, pois é cada vez máis
usual que as empresas investiguen na Rede e se atopen coa face menos
favorecida dos candidatos presentados. Por estas e outras razóns
dará comezo mañá -xoves 13 de xuño- o segundo módulo do curso
Redes
sociais e comunicación 2.0,
promovido polo programa de Voluntariado
Dixital.
Cómpre dicir que estamos perante a continuación dun primeiro módulo
co mesmo título, no que os asistentes tiveron a oportunidade de
coñecer as experiencias de varias empresas na implantación da súa
estratexia dixital.
Emporiso,
nesta segunda quenda -que se levará a cabo os días 13 e 14 de xuño-
abranguerase o tema da Identidade
Dixital,
coa finalidade de amosar a importancia das redes sociais no mercado
de traballo e o impacto da web 2.0 na procura de emprego. Asemade,
explicarase o mellor xeito de construír unha boa Identidade
Dixital
para obter un bo posicionamento profesional na Internet.
Máis
polo miúdo, na xornada do día 13, Víctor Gómez -experto en
consultoría e formación en innovación e marketing-
falará do termo de identidade
dixital
e explicará como tecer unha rede de contactos 2.0. Ao día seguinte -o venres 14- os asistentes coñecerán experiencias prácticas de
empresas e organizacións de captación e selección de recursos
humanos, da man de Alberto Fernández Varela, socio consultor en EGA
Consultores e especialista en desenvolvemento de persoas e busca de
talento para organizacións. Ambas as dúas sesións desenvolveranse
en horario de 16.00 a 20.00 horas no Centro
de Novas Tecnoloxías de Galicia (CNTG)
en Santiago de Compostela ou, de non ser posíbel asistir de xeito
presencial, a través de videoconferencia nas aulas CeMIT
de Ames, Betanzos, Ortigueira, Fisterra, A Coruña, Celanova, A
Cañiza e Vigo. Amais, a xornada poderá seguirse a través do
Twitter
co
hashtag #socialmaisTIC.
Engadir,
por último, que este curso de Redes
Sociais e Comunicación 2.0 é
gratuíto e hoxe, 12 de xuño, é o derradeiro día para inscribirse
a través da ligazón
habilitada para a ocasión.