O ITG contribúe co seu software á chegada de novos vehículos eléctricos alimentados con enerxía solar
martes, 17 de decembro do 2019
- Participantes no proxecto T2UES nunha xuntanza recente
O
Instituto Tecnolóxico de Galicia (ITG)
está a desenvolver unha ferramenta para a recarga de vehículos
eléctricos en postes alimentados con paneis solares. Este
desenvolvemento enmárcase no proxecto T2UES, Transporte Turístico
Urbano Eléctrico Sustentábel, que ten como obxectivo crear
vehículos de propulsión eléctrica a baixo custo para facilitar a
mobilidade limpa e ecolóxica nas zonas turísticas de Huelva e o
Algarve portugués. Liderado pola Universidade de Huelva, o ITG é o
único centro tecnolóxico galego que participa no consorcio, no que
tamén están a Universidade de Sevilla, o INTA ou Universidade do
Algarve, entre outras entidades.
Así,
o consorcio T2UES buscar dar forma a vehículos moi lixeiros, de
reducidas dimensións e propulsión eléctrica a moi baixo custo, con
baterías adaptadas aos traxectos máis habituais desde núcleos
urbanos e hoteis até as praias (e viceversa). Estes vehículos
forneceríanse nunha rede de puntos de recarga baseados en fontes de
enerxía renovábel, como a eólica e a solar.
ITG
achega a súa tecnoloxía e I+D para esas infraestruturas. A
arquitectura de software de recarga que está a materializar o centro
tecnolóxico coruñés estará constituída por un sistema de
comunicacións, que captará información da solución de control
enerxético e do vehículo eléctrico, e unha plataforma IoT
(Internet das Cousas), receptora desta información en tempo real,
que almacenará e mostrará a información, sendo compatíbel con
sistemas desenvolvidos por terceiros.
Unha
contribución para unha mobilidade áxil e limpa en zonas turísticas
Segundo
informa o ITG, “o proxecto T2UES favorecerá a mobilidade na Costa
de Huelva e o Algarve portugués mediante unha enerxía limpa,
especialmente na época estival, cando as localidades situadas nestas
zonas chegan a cuadriplicar ou quintuplicar a súa poboación
estábel”. Os primeiros vehículos adaptados e o primeiro punto de
recarga prevese que estean listos para a súa posta en marcha en 2020
na Costa da Luz e o Algarve, dous destinos turísticos de primeira
magnitude que, en 2018, rexistraron máis de 24 millóns de estadías
hostaleiras.