O Meizu M6 Note contará con dobre cámara traseira

Hai poucas horas o fabricante chinés Meizu presentou o que promete ser o grande supervendas dos vindeiros meses, o seu smartphone de gama media Meizu M6 Note, que chegará ao mercado con pantalla Full HD de 5,5 polgadas, carcasa en tres cores (negra, azul ou dourada), lector de pegadas dixitais de grande velocidade (le unha pegada en 0,2 segundos) e atención pola última tendencia: a dobre cámara.
Pese a estarmos ante un teléfono económico, presenta na súa parte traseira dúas cámaras de 12 e 5 Mpíxeles, con tecnoloxía de enfoque Dual DP (capaz de enfocar en 0,03 segundos), algoritmos de procesamento de imaxe de ArcSoft e obxectivo 6P cunha apertura f/1.9; aínda que tamén chama poderosamente a atención que a súa cámara frontal sexa de 16 Mpíxeles.
O Meizu M6 Note funciona cun procesador Qualcomm Snapdragon 625 de 8 núcleos a 2.0 GHz, 3/4 GB de RAM, 16/32/64 GB de almacenamento, batería de 4.000 mAh con mCharge e carga rápida (18W) e incluso unha versión do seu sistema operativo bastante actualizada (Android 7.1.2).
Este teléfono sairá á venda en China o 2 de setembro a un prezo de 1.099 iuans (140 euros) para o modelo con 3 GB de RAM e 16 GB de almacenamento, de 1.299 iuans (165 euros) para a opción con 3 GB de RAM e 32 GB de almacenamento e de 1.699 iuans (216 euros) para o modelo con 4 GB de RAM e 64 GB de almacenamento. Un digno sucesor do Meizu M5 Note, ao que claramente supera en procesador e tecnoloxía de cámara.