O Redmi K20 chegará a España co nome de Mi 9T

Os smartphones Redmi K20 e K20 Pro tiñan un encaixe pouco ortodoxo no catálogo de Xiaomi, pero ser teléfonos con prestacións moi elevadas que non semellaban propios da familia económica Redmi, de aí que non sorprenda que para o mercado español o Redmi K20 chegue o vindeiro día 17 baixo o nome de Mi 9T, cun prezo de 329 euros para a súa versión con 6 GB de RAM e 64 GB de almacenamento que no seu lanzamento custará só 299 euros. O modelo con 128 GB de almacenamento custará 369 euros, o que continúa a ser un prezo moi competitivo para un dispositivo con esas especificacións.
O Mi 9T será un smartphone con pantalla AMOLED Full HD+ de 6,39 polgadas que ocupa case toda a frontal do terminal grazas a que integra lector de pegadas dixitais en pantalla e opta por unha cámara frontal retráctil de 20 Mpíxeles. Para a súa cámara traseira ten tres obxectivos dos que o principal conta cun sensor de 48 Mpíxeles apoiados por intelixencia artificial. O procesador deste noto smartphone é un Qualcomm Snapdragon 730, a súa batería de 4.000 mAh garante unha boa autonomía (á vez que conta con carga rápida de 18 watts) e incluso ten NFC.
Temos así un smartphone que aparentemente é un alta gama, pero o seu prezo é moi inferior ao que aparenta, o que probablemente contribúa a unhas boas vendas, especialmente mentres non chegue ao mercado o segundo Pocophone.