O Vivo Nex 2 podería incluír unha pantalla traseira para prescindir da cámara frontal

A moda dos móbiles todo pantalla está a chegar a novos niveis da man dos fabricantes chineses, tal e como podemos ver nunha imaxe que ilustra as filtracións sobre o Vivo Nex 2, un smartphone que sairía á venda en decembro para suceder ao Vivo Nex, que sorprendera no seu día ao integrar unha cámara frontal retráctil.
Desta volta o fabricante chinés non se conformaría con integrar o lector de pegadas dixitais na propia pantalla, senón que para poder aforrar o espazo da cámara frontal optan directamente por prescindir dela, e instar ao uso da cámara traseira no seu lugar, acompañada por unha pantalla traseira para que podamos ver o que se está a enfocar.
Co Vivo Nex 2 estariamos ante a solución máis radical para evitar o notch na pantalla frontal, que non sería o único detalle rechamante deste terminal que tería unha cámara traseira tripla rodeada un anel LED que brillaría cando se reciben notificacións.