O Xiaomi 12T Pro presume de cámara de 200 Mpíxeles

Xiaomi presentou oficialmente os seus smartphones Xiaomi 12T e Xiaomi 12T Pro, dispositivos que teñen como principal diferenza o sensor da súa cámara traseira principal, que sería de 108 e 200 Mpíxeles respectivamente. Deste xeito Xiaomi consegue colocarse á cabeza das especificacións técnicas, sen ter que dar un salto a prezos inalcanzables.
O Xiaomi 12T Pro é un smartphone máis que notable, cun procesador Qualcomm Snapdragon 8+ Gen 1, 8/12 GB de RAM LPDDR5, 256 GB de almacenamento interno UFS 3.1, pantalla AMOLED de 6,67 polgadas cunha resolución de 2.712 x 1.220 píxeles e unha velocidade de refresco de 120 Hz, cámara traseira grande angular de 200 Mpíxeles con estabilización óptica de imaxe, enfoque automático e gravación de vídeo 8K (acompañada por un ultra grande angular de 8 Mpíxeles e unha cámara macro de 2 Mpíxeles), cámara frontal de 20 Mpíxeles, NFC, lector de impresións dixitais en pantalla, dobre SIM, altofalantes estéreo con Dolby Atmos e batería de 5.000 mAh con carga rápida de 120 watts (inclúe o cargador que permite esta velocidade de carga que completaría a batería nuns 19 minutos). O seu prezo de venda é de 799,99 euros con 8 GB de RAM e de 849,99 euros con 12 GB de RAM.
O Xiaomi 12T pola súa banda confórmase cun procesador MediaTek Dimensity 8100-Ultra, 8 GB de RAM LPDDR5, 128/256 GB de almacenamento UFS 3.1, unha cámara traseira principal de 108 Mpíxeles con gravación de vídeo en 4K e o resto de característica do seu irmán maior, polo que sería un móbil que con poucos compromisos conseguiría chegar a un maior público grazas a un prezo máis contidos (599,99 euros con 128 GB de almacenamento e 649,99 euros con 256 GB de capacidade).