O dominio .es acada só o 7 por cento do mercado mundial de extensións

Segundo indica un estudo sobre vendas de dominios realizado pola plataforma de comercio de extensións Sedo.com, no primeiro trimestre do ano, o dominio español .es, “logrou tan só o 7 por cento das vendas no mercado mundial das direccións de Internet”, moi por detrás do de Alemaña, o .de, que acaparou o 60 por cento do total de compra-vendas de dominios no mundo.
O informe indica que no devandito periodo, as transferencias de dominios medraron en xeral un 6,5 por cento, cun total de 9.326 extensións vendidas en total.
Entre os dominios específicos do país, ademais do de Alemaña, un dos máis negociados foi o do Reino Unido, o .co.uk, cun 13 por cento das vendas totais, seguido do europeo .ue, co 9 por cento do total de dominios adquiridos.
No tocante ás tarifas, o estudo asegura que o prezo medio da extensión española caeu un 30,4 por cento, mentres que o da británica descendeu un 42,1 por cento. Pola súa parte, o prezo do dominio europeo, o .eu, subiu un 23,2 por cento de valor medio.
O prezo medio máis caro correspondeu ao dominio frances, de 2.654 euros, seguido do español de 1.452 euros e o .ch de Suíza, de 1.219 euros. O dominio .de tivo un prezo medio de 906 euros.
Como era de agardar, o dominio máis forte, o .com, cunha cota de mercado do 75 por cento do total, vendeuse por un prezo de 1.935 euros, seguido de .net, co 9 por cento do total e un prezo medio de 1.142 euros.
Os dominios .org e .net, cun 7 por cento cada un e un prezo de 842 e 570 respectivamente, foron os seguintes na listaxe do máis fortes, seguidos moi de lonxe do .biz co 2 por cento e un prezo de 536 euros.
O estudo indica asemade que nos últimos tres meses, o dominio máis caro que se vendeu foi o fly.com por 1,6 millóns de dólares (1,1 millóns de euros), seguido por body.com por 400.000 dólares (285.700 euros) e forums.com por 399.990 dólares.
Entre os españois, o dominio máis caro foi o mama.es, cun prezo de venda de 10.700 euros, seguido de dot.es de 7.572 euros e 123.es, que se vendeu por 7.500 euros.