O nVIDIA Tegra 650 promete ser capaz de reproducir ata 30 horas de vídeo en alta definición

luns, 2 de xuño do 2008 Marcus Fernández

Prototipo do que podería ser un reprodutor multimedia baseado no Tegra 650

nVIDIA vai ser un dos grandes impulsores dos dispositivos móbiles con grandes posibilidades gráficas, ou iso parece a tenor da presentación dos seus procesadores Tegra 600 e 650. Este último será o primeiro equipo do mundo e considerado o primeiro ordenador integrado nun chip para ordenadores móbiles visuais, pois incorpora nun chip de reducido tamaño o procesador gráfico, a memoria do sistema, a xestión de dispositivos e o procesador principal.
O nVIDIA Tegra 650 seguirá os pasos do Tegra APX 2500 (procesador orientado a móbiles intelixentes con Windows Mobile) e alzarase como unha mestura entre un procesador ARM a 800 MHz e un procesador gráfico Ge Force de baixo consumo.
Precisamente a autonomía será unha das principais bazas do Tegra 650, que sería capaz de reproducir ata 30 horas de vídeo en alta definición e 130 horas de audio. Soportará o uso de pantallas de ata 1.080 liñas en progresivo a través dun porto HDMI (compatible con PAL e NTSC), Wi-Fi, discos duros, teclado, ratos e outros periféricos e incluso podería utilizarse para o proceso de imaxes en alta definición en cámaras fotográficas ou de vídeo.

PUBLICIDADE