O último NAS de TerraMaster pode conectarse até a 10 Gbps

Como solución de almacenamento en rede TerraMaster ten bastantes produtos cunha boa relación calidade-prezo aos que vén de incorporarse o NAS profesional de 4 baías F4-422, que non só está equipado cun procesador Celeron de 4 núcleos a 1,5 GHz, 4 GB de memoria DDR3, 2 portos Gigabit Ethernet e 2 portos USB 3.0, senón que tamén inclúe un porto 10 Gigabit Ethernet, ou sexa, que pode entregar datos a grande velocidade valéndose dunha tecnoloxía de rede local de cable de alto rendemento, que actualmente aínda é moi pouco habitual.
O TerraMaster F4-422 está orientado a pequenas e medianas empresas que queren ter unha solución NAS fiable e rápida, capaz de soportar até a 500 usuarios simultáneos. É posible configurar as unidades de disco instaladas neste NAS en distintos modos RAID e, para ofrecer un rendemento superior, tamén é posible acelerar o dispositivo mediante unha unidade SSD para facer de caché (o que melloraría a eficiencia do almacenamento en máis do 20%).
Este dispositivo que sae á venda por 499,99 euros sen discos pode equiparse con até 4 unidades de disco de 16 TB cada unha , sumando así un total de 64 TB de capacidade, o que resultaría moi práctico como almacenamento masivo de datos en contornos empresariais ou para, por exemplo, traballar con vídeos de ultra alta definición.
Ao estar destinado a un público corporativo, este tipo de unidades non esquecen a seguridade, de xeito que contan con mecanismos de copias de seguridade automáticas programadas, cartafoles cifrados por hardware AES, sistema de arquivos Btrfs (que busca previr a corrupción dos datos) e outras medidas de protección (como os mencionados modos RAID) para garantir un almacenamento seguro da información.
Tal e como vén configurado este NAS poderiamos dicir que é unha proposta de grande velocidade que levaría á máxima expresión os sistemas de almacenamento en rede baseado en discos mecánicos, ou sexa, que para poder conseguir unha velocidade maior resulta inevitable a aposta pola tecnoloxía de almacenamento baseada en memorias de estado sólido.